Atyraý oblysynda 2020-2025 jyldar aralyǵynda 7 mln aǵash otyrǵyzylady
NUR-SULTAN. QazAqparat – Atyraý oblysynda 2020-2025 jyldar aralyǵynda 7 mln aǵash otyrǵyzylady. Bul týraly Úkimet otyrysynda Atyraý oblysy ákimi Mahambet Dosmuhambetov aıtty, dep habarlaıdy QazAqparat tlshisi.
«Atyraý oblysynyń memlekettik orman qorynyń kólemi – 52 400 gektar. Onyń ishinde ormandy alqap – 15 100 gektar. Orman alqaptary neziginen Jaıyq ózeni men Edil ózeni qıǵashynyń boıynda ornalasqan. QR Ekologııa, geologııa jáne tabıǵı resýrstar mınıstrligimen birlese jasaqtalǵan ormandardy molyqtyrý jáne orman ósirý kólemin ulǵaıtýǵa qatysty qadamdyq jospar boıynsha oblysta 2 800 gektar orman alqabynda 2020-2025 jyldary aralyǵynda barlyǵy 7 mln-nan astam aǵash kóshetterin otyrǵyzý josparlanǵan», - deıdi Atyraý oblysy ákimi Mahambet Dosmuhambetov.
Onyń aıtýynsha, Jaıyq ózeni boıyndaǵy toǵaılardy qalpyna keltirý, jaıylma alqaptardy jasyl jelekpen kómkerý Atyraý óńiriniń ekologııalyq ahýalyn jaqsartýǵa oń áserin tıgizedi.
«Qazir mejelengen josparǵa sáıkes, árbir orman sharýashylyǵy mekemesi kóshet egiletin ýchaskeler men aǵash túrleri anyqtalyp, naqty jospar jasaldy. Mundaı aýqymdy jumystardy atqarý orman sharýashylyǵy mekemeleriniń materıaldyq, tehnıkalyq jaraqtandyrý deńgeıine baılanysty ekeni sózsiz. Sońǵy 3 jyl ishinde jergilikti bıýdjetten 427 mln teńgege 3 orman mekemesi quramyna mashına, traktor parki, órt sóndirý stantsııalary, jumys kestesi bar keshender, 2 órt baqylaý munaralary salynyp, paıdalanýǵa berildi. Sondaı-aq, orman mekemelerin jaratqandyrýǵa jergilikti bıýdjetten 206 mln teńge bólindi. Al 2020-2025 jyldarǵa arnalǵan qadamdyq jospar kórsetkishterin oryndaýǵa qajetti qarjy kólemi – 769 mln teńgeni quraıdy», - deıdi ol.
