Atyraý oblysynda 2019 jyly 50 kópqabatty úı salynady
ATYRAÝ. QazAqparat - Atyraý oblysynda 2019 jyly 4 myńnan astam páteri bar 50 kópqabatty úı salynady. Bul týraly Atyraý oblysynyń ákimi Nurlan Noǵaev málim etti.
Oblys ákimi mǵen QR IDM Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov óńirdegi turǵyn úı qurylysy memlekettik baǵdarlamalaryn júzege asyrý, TKSh salasyn tsıfrlandyrý máseleleri boıynsha májilis ótkizdi.
Qazir óńirde turǵyn úı qurylysy salasynda, turǵyn úı-kommýnaldyq sektordy damytý, «7-20-25» ıpotekalyq nesıe berý memlekettik baǵdarlamasy boıynsha aýqymdy jumystar júrip jatyr.
«Qazir Atyraý oblysynda 44 kópqabatty turǵyn úı qurylysy júrýde, jyl sońyna deıin 34 úıdi paıdalanýǵa berý josparlanyp otyr. Oblys ortalyǵy mańynan aýdany 1,4 gektar jańa yqshamaýdan salý josparda bar. Bolashaq qurylystyń jobalaý-smetalyq qujattamasyn daıyndaý, qajet ınfraqurylym tartý jumystary júrýde. Turǵyn úı-kommýnaldyq sharýashylyq nysandary qysqy maýsymǵa tolyq daıyn», - dedi Nurlan Noǵaev.
Halyqty baspanamen qamtý jumystary 2019 jyly da jalǵasady. Aldaǵy jyly oblysta 50 kópqabatty úı (4 myńnan astam páter) salý josparlanǵan. Sonymen qatar, kommertsııalyq 19 kópqabatty úı qurylysy júrýde, ol páterler «7-20-25», «Nurly jer» memlekettik ıpotekalyq baǵdarlamalar arqyly beriledi.
Aımaq basshysy Atyraýdaǵy káriz-tazartý qondyrǵysy qurylysynyń mańyzyna toqtaldy.
Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov óńirdegi atqarylyp jatqan jumystardyń mańyzdylyǵyn atap ótti.
«Turǵyn úı-kommýnaldyq sharýashylyq salasyn tsıfrlandyrý, atalǵan jobanyń artyqshylyqtary týraly halyqqa túsinik berý jumystary óte mańyzdy», - dep atap ótti M.Jaıymbetov.
Qurylys jáne turǵyn úı-kommýnaldyq sharýashylyq isteri komıteti tóraǵasynyń aıtýynsha, óńirde «Nurly jer», «Nurly jol» memlekettik baǵdarlamalary tabysty iske asyp jatyr. Turǵyn úı qurylysy qarqyndy júrýde. «7-20-25» baǵdarlamasy aıasynda oń kórsetkishter bar.
Jınalysta «E-Shańyraq» elektrondy júıesin qurý boıynsha joba tanystyrylymy ótti. Bul joba TKSh salasynyń ashyqtyǵyn qamtamasyz etýge, turǵyn úı-qurylys salasynyń barlyq sýbektilerin qamtýǵa múmkindik beredi. Joba arqyly turǵyndar ınternet resýrstardy qoldana otyryp, aýdarymdar men tólemderdiń durystyǵyn tekserip, úı boıynsha shyǵyndar men kiristerdi baqylaıdy, TKSh problemalary týraly shaǵymdar qaldyra alady.
Sonymen qatar jıynnda TKSh nysandaryn esepke alý jónindegi aqparat aıtyldy. Bul jumystar turǵyndar men turǵyn úı-kommýnaldyq sektor nysandarynyń mıllıondaǵan qarajattaryn únemdeýlerine múmkindik beredi.
