Atyraý oblysynda 20 qarashadan beri Pfizer vaktsınasyn 3 887 adam saldyrdy

ATYRAÝ. QazAqparat – Atyraý oblysynda 262 myńǵa jýyq adam vaktsınalardyń I komponentin saldyrdy, dep habarlaıdy QazAqparat.

Oblystyq densaýlyq saqtaý basqarmasy baspasyóz qyzmetiniń málimetinshe, turǵyndarǵa vaktsına salý úshin 69 egý beketi jumys isteıdi. Onyń ishinde 10 jyljymaly beket bar.

«Qazir Atyraý oblysynda koronavırýs ınfektsııasynyń taralýy órship tur. Soǵan baılanysty óńir «qyzyl» aımaqqa endi. Qaýipti vırýstyń taralýyn tejeýdiń birden bir joly – vaktsına saldyrý. Byltyrǵy 1 aqpannan bıylǵy 18 qantar aralyǵyndaǵy kezeńde COVID-19 ınfektsııasyna qarsy vaktsınalardyń I komponentin 261 911 adam ektirdi. Vaktsınalardyń II komponentin saldyrǵandardyń sany 244 855 adamǵa jetti», -dep habarlady basqarmanyń baspasóz qyzmeti.

Al, oblystyq densaýlyq saqtaý basqarmasy basshysynyń orynbasary Qaısar Abdalıevtyń aıtýyna qaraǵanda, Rfizer vaktsınasyn salý byltyrǵy 20 qarashada bastaldy. Sol kezde óńirge vaktsınanyń 32 760 dozasy jetkizilgen bolatyn. Bıylǵy jyl basynan beri atalǵan vaktsınanyń eki komponenti úshin 126 myń 520 doza jetkizilgen.

«Bul vaktsınany alatyn 12 men 18 jas aralyǵyndaǵy balalar sany 63 138 adamdy quraıdy. Al, bala emizetin jáne júkti áıelder sany – 35 362. Byltyrǵy 20 qarashadan beri Pfizer vaktsınasyn 3 887 adam saldyrdy. Onyń ishinde bala emizip otyrǵan 1 880 ana men 197 júkti áıel bar. Sondaı-aq, 12-18 jas aralyǵyndaǵy 1 717 jasóspirim men 93 zeınetker vaktsına ektirdi», -dep málim etti basqarmanyń baspasóz qyzmeti.

Eske sala ketelik, buǵan deıin Atyraý oblysynda Pfizer vaktsınasyn 3626 adam saldyrǵanyn habarlaǵan bolatynbyz.