Atyraý oblysynda 192 otbasyǵa jańa páter berildi
Inder aýdandyq qurylys bóliminiń basshysy Altynbek Ǵabdýllınniń aıtýynsha, «Nurly jer» baǵdarlamasymen Inderbor kentindegi «Kóktem» shaǵyn aýdanynda 4 turǵyn úı boı kótergen. Turǵyn úıdiń árqaısysynda 48 páter bar. Tórt qabatty turǵyn úılerdiń qurylysyn «Evrostroı» JShS, abattandyrý jumystaryn «Agrospetsmontaj» JShS júrgizgen. Jańa turǵyn úıler ortalyqtandyrylǵan jylý qazandyǵyna qosylǵan.
«Memleket tarapynan muqtaj otbasylardy qoldaý sharalary udaıy jalǵasyp keledi. Konstıtýtsııa kúnine oraı memlekettik baǵdarlama aıasynda salynǵan turǵyn úıden 192 otbasyǵa jańa páter berilip otyr. Onyń ishinde kópbalaly 106, áleýmettik turmysy tómen 69 otbasy bar. Ata-ana qamqorlyǵyn kórmeı ósken 17 jsóspirim de jańa baspanaǵa ıe boldy», - deıdi Inder aýdany ákiminiń orynbasary Áset Orazǵalıev.
Jańa turǵyn úıden páter alǵannyń biri – Raıgúl Botaeva. Onyń otbasy asyraýshysynan aırylǵandar sanatyna kiredi. Buǵan deıin basybaıly baspanasy bolmaı, 20 jylǵa jýyq páter jaldap kelgen.
«Bul – bizdiń kóp jyl armandaǵan baspanamyz. Óıtkeni tabysymyzdan qarjy jınap, úı alýǵa múmkindigimiz bolmady. Endi mine, memlekettik baǵdarlamamen salynǵan turǵyn úıden jańa páterdiń kiltin aldyq. Qýanyshqa kenelip turmyz. Ásirese, balalarymyzdyń qýanǵanyn kórýden asqan baqyt bolmaıtynyna kózim jetti», - deıdi Raıgúl Botaeva.
Osyndaı qýanyshqa kenelgenderdiń qatarynda birinshi toptaǵy múgedek qyzyn tárbıelep otyrǵan N.Ótegenova, kópbalaly B.Ibraeva, M.Qaıyrjanqyzy, G.Qabdolova syndy analar bar.
Eske sala ketelik, budan buryn Atyraýda daryndy balalarǵa arnalǵan sport mektep-ınternaty ashylǵanyn habarlaǵan edik.
