Atyraý oblysynda 19 myń tonna kókónis saqtaıtyn eki qoıma salynady
Atyraý oblysynyń ákimi Serik Shápkenovtiń aıtýynsha, áleýmettik mańyzy bar taýarlardyń, onyń ishinde kókónis ónimderiniń baǵasyn turaqtandyrý maqsatynda keshendi sharalar qolǵa alynǵan. Atyraý oblysynyń turaqtandyrý qoryna 3,5 mlrd teńge bólingen. Bul qarjynyń 2,9 mlrd teńgesi kásipkerlerge aınalym shemasymen jáne forvardtyq kelisimsharttar arqyly berilgen.
«Óńirdegi aýyl sharýashylyǵy taýaryn óndirýshilerge 1,8 mlrd teńge berilip otyr. Bul bólingen qarjynyń 62 paıyzyn quraıdy. Qarajatqa 9,5 myń tonna aýylsharýashylyq ónimi satyp alyndy. Áleýmettik mańyzy bar ónimder tutynýshyǵa naryqtaǵydan 15-20% tómen baǵamen satyldy. Qazir turaqtandyrý qorynyń qalǵan qarajatyna Qazaqstannyń basqa óńirlerinen jáne shetelden ońtaıly baǵamen kókónis ónimderin jetkizýge kelisimsharttar pysyqtalyp jatyr», - deıdi Serik Shápkenov.
Ákimniń aıtýyna qaraǵanda, azyq-túlik qaýipsizdigin qamtamasyz etý úshin birqatar jobalar iske asyrylýda. Bıyl Mahambet aýdanynda 4 gektar aýmaqqa jańa úlgide salynǵan jylyjaı kesheni iske qosyldy. Jyl sońyna deıin aýmaǵy 5,6 gektar bolatyn taǵy bir jylyjaı keshenin paıdalanýǵa berý josparlanyp otyr. Sondaı-aq aınalym shemasy esebinen kókónis ónimderiniń alqaby 160-tan 300 gektarǵa deıin ulǵaıtylǵan.
«Qazir Atyraý oblysynda 26 kókónis qoımasy jumys isteıdi. Bıyl jylyjaılardyń jumysyna zerdeleý júrgizildi. Klımattyq baqylaý júıelerimen jabdyqtalǵan 10 qoıma iriktelip, esepke alyndy. Endi jalpy syıymdylyǵy 19 myń tonnany quraıtyn kókónis qoımalaryn salý boıynsha eki ınvestıtsııalyq joba qarastyrylyp otyr. Osy eki jobany iske asyrý qoımalar syıymdylyǵyn 62,6% arttyrýǵa múmkindik beredi», - deıdi Serik Shápkenov.
Eske sala ketelik, buǵan deıin Atyraý oblysynda quny 3 mlrd teńge bolatyn jańa jylyjaıdyń birinshi kezeńi paıdalanýǵa berilgenin jazǵan edik.
