Atyraý oblysynda 165 myńǵa jýyq gektar jer memleket menshigine qaıtaryldy
Atyraý oblystyq jer qatynastary basqarmasynyń basshysy Álibek Ermekqalıdiń málimetinshe, bıylǵy segiz aıda memleket menshigine 119 jer telimi qaıtarylǵan.
«Byltyr aýyl sharýashylyǵy maqsatynda ıgerilmeı jatqan 201,82 myń gektar jer anyqtaldy. Onyń ishinde 17,67 myń gektary shara qoldanýdyń nátıjesinde qaıta ıgerile bastady. Al, 87,08 myń gektar jer memleket menshigine qaıtarylǵan edi. Bıylǵy segiz aıda 164 826,85 gektar aýyl sharýashylyǵy maqsatyndaǵy 119 jer ýchaskesi memleketke qaıtarylyp otyr», - dep habarlady Álibek Ermekqalı.
Onyń aıtýynsha, memleketke qaıtarylǵan jer telimderiniń 164 776,85 gektary jaıylymdyq, al 50 gektary shabyndyq alqap bolsa, 3 gektary basqa maqsat úshin alynǵan.
«Jer teliminiń 164 326,85 gektaryn ıeleri óz erkimen qaıtaryp berdi. Qazir jergilikti atqarýshy organdardyń mamandary 97,07 myń gektar jerdiń ıgerilmeý sebebin anyqtaý máselesin qarap jatyr», - dep málim etti Álibek Ermekqalı.
Eske sala ketelik, buǵan deıin Atyraý oblysynda paıdalanylmaǵan 21 myń gektardan astam jer keri qaıtarylǵanyn habarlaǵan bolatynbyz.
Oblystyq jerdiń paıdalanýy men qorǵalýyn baqylaý basqarmasynyń basshysy Gúlzııa Qurmanovanyń málimetinshe, jyl basynan beri aýyl sharýashylyǵy maqsatyndaǵy 21552,25 gektar 23 jer ýchaskesi memleketke qaıtyrylǵan.
