Atyraý oblysynda 159 órt tirkelip, 2 adam qaza tapqan

ATYRAÝ. QazAqparat – Atyraý oblysynda bıylǵy 7 aıda tehnogendik sıpattaǵy 159 órt oqıǵasy tirkeldi. Sonyń saldarynan 11 adam zardap shegip, 2 adam qaza tapqan, dep habarlaıdy QazAqparat tilshisi.

Oblystyq tótenshe jaǵdaılar departamentiniń qoǵammen baılanys tobynan málim etkendeı, ótken jylmen salystyrǵanda, órt oqıǵasy 13,5 paıyzǵa, zardap shekkender sany 8,3 paıyzǵa tómendegen.

«Byltyr oblysta 181 órt tirkeldi. Órttiń 69 deregi turǵyn úılerde bolǵan edi. Al, 46 avtokólikti jalyn sharpydy. Atyraý qalasynyń aýmaǵynda 100, Jylyoı aýdanynda 16, Qyzylqoǵada 8, Qurmanǵazyda 8, Mahambette 8, Isataıda 7, Inderde 5, Maqat aýdanynda 5 órt bolǵany anyqtaldy. Tilsiz jaýdyń shyǵý oshaǵy turǵyn úı sektorynda – 63, avtokólikterde – 41, kópqabatty úılerde – 20, saýda oryndarynda – 7, basqa da nysandarda 26 márte tutandy. Al, oblys aýmaǵynda bıylǵy 7 aıda 159 tehnogendik sıpattaǵy órt oqıǵasy tirkelip otyr. Bul ótken jylmen salystyrǵanda, 13,5 paıyzǵa az. Jalynnyń saldarynan 11 adam shegip, byltyrǵydan 8,3 paıyzǵa tómendedi. Ókinishke qaraı, órtten 2 adam qaza tapty», - deıdi departamenttiń aǵa ınjeneri, azamattyq qorǵaý aǵa leıtenanty B. Qabaqov.

Onyń aıtýynsha, departament qyzmetkerleri órt qaýipsizdigi talaptaryn túsindirý, órttiń jáne tótenshe jaǵdaılardyń aldyn alý, boldyrmaý maqsatynda 26 440 jeke turǵyn úıge baryp, 78 897 turǵynǵa 79 289 dana jadnama taratqan.

Eske sala ketelik, buǵan deıin Atyraý oblysynda qysqa azyq retinde daıyndalǵan 10 tonnadan astam shóp órtenip ketkenin jazǵan edik.