Atyraý oblysynda 1500 ata-ana túngi ýaqytta balalary qaraýsyz júrgeni úshin jazalanǵan
ATYRAÝ. QazAqparat – Atyraýda túngi ýaqytta mas júrgen 17 jasóspirim anyqtaldy, dep habarlaıdy QazAqparat.
Oblystyq polıtsııa departamenti baspasóz qyzmetiniń aqparatyna súıensek, ótken jyly túngi saǵat 23:00-den keıin ata-anasynyń ruqsatynsyz júrgen 1500-ge jýyq jasóspirim anyqtalǵan. Olardyń báriniń ata-anasy ákimshilik jaýapkershilikke tartylǵan.
«Polıtsııa qyzmetkerleri bıylǵy jyl basynan beri qoǵamdyq orynda ishimdik iship júrgen 20-ǵa jýyq jasóspirimdi anyqtady. Sonyń biri – Qyzylqoǵa aýdanynan kelgen 17 jasar bozbala. Ol túngi saǵat 23:30 shamasynda «Isataı-Mahambet» alańynda ata-anasynyń qaraýynsyz júrgen. Tekserý kezinde onyń masań kúıde ekeni belgili boldy. Ol dostarymen birge syra ishkenin moıyndady» dep habarlady departamenttiń baspasóz qyzmeti.
Syraǵa mas bolǵan bozbalanyń ata-anasy shaqyrtylyp, olarǵa qatysty QR Ákimshilik quqyqbuzýshylyq týraly Kodeksiniń 442-babynyń 2-bóligimen eskertý berilgen. Osy Kodekstiń 440-babynyń 2-bóligimen 5 aılyq eseptik kórsetkish kóleminde aıyppul salynǵan.
Eske sala ketelik, budan buryn Atyraýda 16 jasar bozbala nómiri jasyrylǵan kólikti júrgizgenin habarlaǵan bolatynbyz.
