Atyraý oblysynda 15 jasar jasóspirim kanal sýyna batyp ketti
Atyraý oblystyq tótenshe jaǵdaılar departamentiniń qoǵammen baılanys tobynyń málimetinshe, oqıǵa keshe, 29 mamyrda bolǵan.
«Jasóspirim Qurmanǵazy aýdanyndaǵy Nurjaý aýylynyń tusymen ótetin Sharon ózeniniń saǵasyndaǵy «Jińishke» kanalynyń tyıym salynǵan jerine sýǵa túsken. Jergilikti ýaqytpen saǵat 17:07 shamasynda 2008 jylǵy jasóspirimniń tereńdigi 3 metr bolatyn kanal sýyna shomylý kezinde batyp ketkeni anyqtaldy. Soǵan baılanysty departamenttiń qutqarýshylary men aýyl turǵyndary sýasty izdestirý jumystaryn júrgizdi. Saǵat 19:05-te jasóspirimniń múrdesi sýdan shyǵaryldy», -dep habarlady departamenttiń qoǵammen baılanys toby.
Atyraý oblysynda sýǵa shomylý maýsymy áli bastalǵan joq.
Oblystyq tótenshe jaǵdaılar departamenti azamattyq qorǵaý basqarmasynyń bastyǵy Baqyt Ablanovtyń aıtýynsha, shomylý merzimi bıyl 15 maýsymǵa shegerilip otyr.
«Jaıyq ózeninde sý deńgeıi áli de turaqtaǵan joq. Mundaı kezde aǵys adam ómirine qaýip tóndiredi. Oblys ákiminiń ókimimen tótenshe jaǵdaılardyń aldyn alý, shomylý maýsymynda qaýipsizdikti qamtamasyz etý jónindegi is-sharalar jospary bekitildi. Bıylǵy 17 sáýirde ádilet departamentinde «Atyraý oblysynyń sý obektileri men sý sharýashylyǵy qurylystarynda jappaı demalý, týrızm jáne sport úshin oryndaryn belgileý týraly» qaýly tirkeldi. Qaýlyǵa osyǵan sáıkes oblys aýmaǵynda 46 demalys orny belgilendi. Onyń ishinde 27 orynnyń ınfraqurylymyn qutqarý jabdyqtarymen, qutqarýshylarmen, medıtsınalyq pýnktterimen jaraqtandyrýǵa qarjy bólindi. Jalpy, shomylý maýsymyna arnalǵan demalys ornynyń sany 85%-ǵa artty», - dep habarlady Baqyt Ablanov.
Eske sala ketelik, budan buryn Atyraý oblysynda shomylý merzimi 15 maýsymǵa shegerilgenin habarlaǵan edik.
