Atyraý oblysynda 15 myńǵa jýyq búldirshin balabaqsha kezeginde tur
Atyraý oblystyq bilim basqarmasynyń basshysy Gúlnar Sádýahasova málimetinshe, óńirde mektepke deıingi 319 mekeme jumys isteıdi.
Onda 42 895 bala tárbıelenip jatyr.
«Qazir 252 memlekettik mekeme bar. Bul – 151 balabaqsha, 101 shaǵyn ortalyq. Buǵan qosa jeke ıeliktegi 67 balabaqshada mektepke deıingi tárbıe beriledi. Biraq, 1-6 jas aralyǵyndaǵy balalarǵa oryn jetispeıdi. Balabaqsha kezeginde 6 jasqa deıingi 14 809 bala tur. Bul – kóp jyldan beri sheshilmeı kele jatqan problemanyń biri», -deıdi Gúlnar Sadýahasova.
Onyń aıtýynsha, óńirde 2023-2027 jyldarǵa arnalǵan balabaqsha kezegin sheshý jospary ázirlengen.
Bes jyl ishinde 16 882 bala úshin jańa oryn ashý josparlanyp otyr.
«Ótken jyldyń jeltoqsan aıynda Atyraý qalasyndaǵy «Juldyz» jáne «Kóktem» shaǵyn aýdandarynda árqaısysy 160 oryndyq eki balabaqsha ashyldy. Qazir árqaısysy 290 oryndyq 9 balabaqshanyń qurylysy aıaqtaldy. Bul nysandar jaqyn arada paıdalanýǵa beriledi. Al, «Órken» shaǵyn aýdanynda 160 oryndyq, Besikti aýylynda 280 orynǵa eseptelgen balabaqsha qurylysy júrgizilip jatyr. Geolog eldi mekenindegi «Shańyraq» balalar úıiniń ornynda 320 oryndyq balabaqshanyń qurylysy salynady. Osyǵan baılanysty jańa nysannyń jobalyq-smetalyq qujattamasyn daıyndaý qolǵa alyndy», -dep málim etti Gúlnar Sadýahasova.
Eske sala ketelik, buǵan deıin Atyraýda apatty jaǵdaıdaǵy «Tulpar» balalar lageriniń ǵımaraty buzylatynyn habarlaǵan edik.
