Atyraý oblysynda 14 jer ýchaskesi memleket ıeligine qaıtaryldy

ATYRAÝ. QazAqparat – Atyraý oblysynda jalpy somasy 6 mln teńgeden asatyn 14 jer ýchaskesi memleket ıeligine qaıtaryldy. Jer ýchaskeleriniń kólemi 2,8 myń gektardy quraıdy, dep habarlaıdy QazAqparat tilshisi.

Qurmanǵazy aýdanynyń prokýrory Magılan Rahımovtyń málimetinshe, jaıylymdyq jer ýchaskeleriniń maqsatty paıdalanýyna taldaý júrgizilgen.

«Aýdandyq prokýratýra qyzmetkerleriniń taldaýy kezinde jaıylymdyq jerler uzaq ýaqyt tikeleı maqsatyna paıdalanylmaǵany anyqtaldy. Jer paıdalanýshylardyń malyn da tirkelmeı kelgen. Osyǵan oraı, aýdan ákimdigine zańdylyqtyń buzylýyn joıý týraly usynys engizildi. Prokýrorlyq qadaǵalaý aktisimen memlekettiń ıeligine 2,8 myń gektardy quraıtyn 14 jer ýchaskesi qaıtaryldy. Jer ýchaskeleriniń kadastrlyq quny 6 mln teńgeden asady», -dep habarlady aýdan prorkýory Magılan Rahımov.

Onyń aıtýynsha, 2021 jyly konkýrs arqyly satylǵan jer ýchaskeleriniń satyp alý qunyn ótemeý deregi anyqtalyp otyr. Taldaý nátıjesimen bıýdjetke 3,8 mln teńge óndirildi.

Eske sala ketelik, budan buryn Atyraý oblysynda memleket ıeligine 210 myń gektar jer qaıtarylatynyn jazǵan bolatynbyz.

Jer resýrstaryn basqarý komıteti Atyraý oblysy boıynsha departamentiniń basshysy Gúlzııa Qurmanovanyń málimetinshe, jer ýchaskesin nysanaly maqsatqa saı ıgermegenderge 21 nusqama berilgen.

Jer kodeksiniń talaptaryn saqtamaǵan, jer ýchaskelerin zańǵa qaıshy paıdalanǵandarǵa 18 nusqama joldanǵan.

«Ótken jyly 185 jer ýchaskesi qaıtaryldy. Jer teliminiń jalpy kólemi 206 myń 209,90 gektardy quraıdy. Bıyl 210 myń gektar aýyl sharýashylyǵy maqsatyndaǵy jer ýchaskesin memleketke qaıtarý josparlanyp otyr», - deıdi Gúlzııa Qurmanova.