Atyraý oblysynda 13 jyldan beri qujatsyz júrgen ózbekstandyq anyqtaldy
Oblystyq polıtsııa departamenti baspasóz qyzmetiniń aqparatyna qaraǵanda, «Mıgrant» is-sharasy kezinde 13 jyldan beri elden ketpeı júrgen sheteldik anyqtalǵan.
«Qyzylqoǵa aýdandyq polıtsııa bóliminiń ýchaskelik polıtsııa ınspektory Qaıyrbek Qamaladenov ákimshilik aýmaqtaǵy turǵyn úılerdi tekserý kezinde ózbekstandyq áıeldi anyqtap, kóshi-qon qyzmeti tobyna jetkizdi. Atalǵan top qyzmetkerleri sheteldik áıeldiń Qazaqstan Respýblıkasynyń aýmaǵyna 2010 jyldary kirgenin anyqtady. Sodan beri qujatynyń elde bolý merzimi bitkenin bile tura, Qazaqstan aýmaǵynan shyǵyp ketpegen. Ózbekstandyq áıel Qazaqstan azamatyna kúıeýge shyǵyp, zańdy nekege otyrǵan. Eki balany dúnıege ákelgen. Sheteldiktiń túsindirýinshe, Qazaqstan Respýblıkasynyń azamattyǵyn alýǵa nıeti bar. Biraq, 13 jyldan beri azamattyq alýǵa qajetti qujattardy tolyq jınaqtap tapsyrmaǵan», - dep habarlady departamenttiń baspasóz qyzmeti.
Qazir atalǵan derekke qatysty Qyzylqoǵa aýdandyq polıtsııa bólimine qarasty kóshi-qon qyzmeti tobynyń qyzmetkerleri hattama toltyrdy. Jınaqtalǵan is-qujattary Qyzylqoǵa aýdandyq sotyna jiberildi.
Eske sala ketelik, buǵan deıin Ózbekstandyq qarııa Atyraýda 21 jyl boıy qujatsyz júrgenin habarlaǵan bolatynbyz. Ózbekstan Respýblıkasynan 2000-jyldary kelgen 72 jastaǵy qarııa jergilikti áıelmen otbasyn qurǵan. Erli-zaıyptynyń 5 balasy bar. Sheteldiktiń jeke basyn anyqtap, eline qaıtarý úshin tıisti qujattar tizbesi Ózbekstan Respýblıkasynyń Aqtaý qalasyndaǵy bas konsýldyǵyna joldanǵan.