Atyraý oblysynda 117 balabaqshanyń qyzmetkerlerine jalaqy keshiktirilgen
Bul týraly oblys ákiminiń orynbasary Baqytgúl Hamenovanyń tóraǵalyǵymen ótken selektorlyq jıynda belgili boldy. Jıynǵa Atyraý qalasy men aýdandar ákimderiniń orynbasarlary qatysty.
Baqytgúl Hamenovanyń málimetinshe, óńirde bıyldan bastap oblystyq Bilim basqarmasy men bilim bólimderi oblystyq bıýdjetten qarjylandyrylyp otyr.
«Keıbir balabaqshalar men qosymsha bilim berý mekemelerinen basqasy tıisti eńbekaqysyn aldy. Qazir oblysta 149 balabaqsha bar. Onyń ishinde mektepke deıingi 117 mekemeniń qyzmetkerlerine qujattardyń kesheýildeýinen jalaqy keshiktirilgen. Sondaı-aq, 17 qosymsha bilim berý uıymynyń ishinen 4 mekemeniń qyzmetkerlerine eńbekaqy tólendi», - dedi oblystyq Bilim basqarmasy basshysynyń orynbasary Tolǵanaı Kólbaeva.
Oblys ákiminiń orynbasary Baqytgúl Hamenova tıisti basshylarǵa bilim berý mekemelerindegi eńbekaqynyń keshiktirilý sebebin anyqtap, máseleni jedel sheshý qajettigin tapsyrdy.
«Muǵalim men dáriger qaı kezde de qoǵam damýynyń jetekshi kúshi sanaldy. Olardyń artynda eńbekaqyǵa qarap otyrǵan tutas januıa bar. Otbasy, adam taǵdyryn oılasaq, jalaqyny keshiktirý, bermeý degen másele týyndamaýy kerek. Sondyqtan, atalǵan bilim berý uıymdary qyzmetkerleriniń eńbekaqysyn keshiktirmeı, aqpan aıynyń 10-yna deıin berý kerek. Budan bylaı aqpan, naýryz aılarynyń eńbekaqysy ár aıdyń 25-inde ýaqytyly tólenip otyrady. Ony ózim qadaǵalaıtyn bolamyn» -dedi Baqytgúl Hamenova.
Eske sala ketelik, budan buryn Atyraýda 1 myńnan astam jumysshynyń 263,8 mln teńge jalaqy qaryzy ótelgenin jazǵan bolatynbyz.