Atyraý oblysynda 114 jas dáriger jumysqa qabyldandy
ATYRAÝ. QazAqparat - Atyraý oblysynyń medıtsınalyq mekemeleri 114 jas dárigermen tolyqty. Bul týraly Densaýlyq saqtaý basqarmasynyń bastyǵy Mánshúk Aımurzıeva málimdedi, dep habarlaıdy QazAqparat tilshisi.
Onyń sózine qaraǵanda, búgingi tańda oblysta densaýlyq saqtaý salasyndaǵy basty problemalardyń biri kadrmen qamtamasyz etý, tájirıbeli dárigerler men pedıatrlardyń, sondaı-aq basqa arnaıy mamandardyń jetispeýshiligi bolyp otyr.
Boljam boıynsha 2020 jylǵa deıin jalpy tájirıbesi bar 50 dárigerdiń, 65 pedıatr men 52 naqty salaǵa baǵyttalǵan mamandar jetispeýshiligi paıda bolady. Qazirgi ýaqytta oblysqa anestezıolog-reanımatologtar, neonatolog, patologoanatom, sot sarapshylary, akýsher-gınekologtar, onkologtar, ftızıatrlar, ftızıopedıatrlar, pýlmanologtar qajet», - dedi dedi M. Aımurzıeva Óńirlik kommýnıkatsııalar qyzmetinde ótken brıfıngte.
Saladaǵy kadr tapshylyǵy máselesin sheshý úshin densaýlyq saqtaý basqarmasynyń mamandary medıtsınalyq joǵary oqý oryndarynyń bazasynda ótetin bos oryndar jármeńkesine baryp, jas mamandardy óńirdiń medıtsınalyq uıymdaryna jumys isteýge shaqyrady. Osy oraıda, bıylǵy jyldyń І toqsanynda 114 jas mamanmen aldyn-ala kelisimsharttar jasaldy.
Sonymen qatar, ótken jyldyń kúzinen bastap 35 atyraýlyq stýdent 4 respýblıkalyq medıtsınalyq joǵary oqý oryndarynda jergilikti grant boıynsha bilim alýda. Oqýlaryn bitirgennen keıin olar kelisimshartqa sáıkes 5 jyl kóleminde Atyraý oblysynyń medıtsınalyq mekemelerinde jumys isteıdi. Odan bólek jergilikti atqarýshy organdar birqatar memlekettik qoldaýlardy paıdalana otyryp, jas mamandardy turǵyn úımen qamtamasyz etý máselesin de sheshýde.
Abaı Aqmurzıev
foto:newsgeorgia.ge
