Atyraý oblysynda 11 myń adam revaktsınalaýdan ótti
Buǵan deıin Atyraý oblysynda koronavırýs ınfektsııasyn juqtyrý qaıta órshigenin jazǵan edik. Qazir koronavırýspen aýyrǵan 8 naýqastyń jaǵdaıy aýyr. Naýqastyń biri ókpeni jasandy jeldetý apparatyna qosylǵan.
«Óńirde koronavırýs ınfektsııasynyń juqtyrý dereginiń kúrt ósýine baılanysty aqparattyq túsindirý jumysy jandandy. Dárigerler turǵyndarǵa vaktsına saldyrý men revaktsınalaýdyń mańyzy týraly keńinen túsindirip jatyr. Byltyrǵy 23 qarashada bastalǵan revaktsınalaý qarqyn aldy. Revaktsınalaýdy birinshi kezekte dárigerler men polıtseıler, muǵalimder, quqyq qorǵaý organdary men arnaıy mekemelerdiń qyzmetkerleri, memlekettik qyzmetshiler, sondaı-aq, stýdentter men sozylmaly syrqaty bar patsıentter alady. Olardyń jalpy sany –50 myń adam. Osy kezge deıin osyndaı segiz sanatqa engenderdiń arasynan 11 123 adam qaıta vaktsınalaýdan ótti», - dep habarlady oblystyq densaýlyq saqtaý basqarmasynyń baspasóz qyzmeti.
Eske sala ketelik, budan buryn Atyraý oblysynda koronavırýs ınfektsııasyna qarsy vaktsınanyń tórt túri baryn habarlaǵan bolatynbyz.
