Atyraý oblysynda 11 memlekettik mekemeniń basshysyna 1,7 mln teńge aıyppul salyndy
Qurmanǵazy aýdanynyń prokýratýrasy memlekettik organdardyń memlekettik satyp alý salasyndaǵy qyzmetine taldaý júrgizdi. Taldaý qorytyndysymen «Memlekettik satyp alý týraly» Zańǵa sáıkes quzyrettilik talaptaryna saı kelmeıtin ónim berýshilerdi jeńimpaz dep taný, naqty taýardyń ataýynyń markasyn kórsetý, taýarlardy jetkizýdiń qysqa merzimin aıqyndaý faktileri anyqtaldy.
«Máselen, tapsyrys berýshi «Qurmanǵazy aýdany Aqkól aýyldyq okrýgi ákiminiń apparaty» MM atynan merdigerlerge aldyn ala satyp alynatyn taýarlardyń markasy, ataýy týraly málimetter berilgen. Birqatar bilim berý uıymdary qoıylǵan talaptarǵa sáıkes kelmeıtin qyzmet kórsetetin kásipkerlerdi zańsyz jeńimpaz dep tanyǵan. Prokýrorlyq den qoıý sharalarymen memlekettik satyp alý týraly zańnamany buzǵan memlekettik mekemelerdiń 11 basshysyna 1,7 mln teńgeden astam somaǵa ákimshilik aıyppul salyndy. Al, 14 laýazymdy tulǵa tártiptik jaýapkershilikke tartyldy», - dep habarlady oblystyq prokýratýranyń baspasóz qyzmeti.
Eske sala ketelik, buǵan deıin Atyraýda ata-ana qamqorlyǵynsyz qalǵan 11 bala úı kezegine qoıylmaǵanyn jazǵan edik. Bul derek Atyraý qalalyq prokýratýrasy júrgizgen tekserý kezinde anyqtalǵan.
«Jergilikti ýákiletti organdardyń áreketsizdiginen jetim jáne ata-ana qamqorlyǵyna alynbaǵan 11 bala turǵyn kezegine alynbaǵany anyqtaldy. Olar jasóspirimder balalar úıinen shyǵarylǵan kezde zańǵa sáıkes turǵyn úısiz qalýy múmkin. Sol sebepten, prokýrorlyq den qoıý sharalarynan soń 11 adam tıisti esepke alyndy», - dep habarlady qalalyq prokýratýranyń baspasóz qyzmeti.
