Atyraý oblysynda 107 mektep túlegine ákimniń bilim granty berildi
Atyraý oblysy ákiminiń orynbasary Jasulan Bısembıevtiń tóraǵalyǵymen bilim berý grantyn bólý jóninde konkýrstyq komıssııanyń otyrysy ótti. Onda oblys ákiminiń bilim grantyna ótinish bergen úmitkerler tizimi qaraldy.
Oblystyq bilim basqarmasy basshysynyń mindetin atqarýshy Aınagúl Dúısekenovanyń aıtýynsha, óńirdegi kadr tapshylyǵyn sheshý maqsatynda oblystyq bıýdjet esebinen densaýlyq, bilim jáne basqa da mańyzdy salalar boıynsha bilim berý granty bólinip otyr. Bıyl konkýrsqa qatysýǵa 231 talapker ótinish bergen.
«Bıyl oblys ákiminiń bilim granty 107 túlekke berildi. Ákim grantyn ıelengen túlekterdiń deni – bolashaq muǵalimder men dárigerler. Onyń ishinde 32 túlek M. Ospanov atyndaǵy Batys Qazaqstan memlekettik medıtsınalyq ýnıversıtetine, 19 túlek S. Asfendııarov atyndaǵy Qazaq ulttyq medıtsına ýnıversıtetine oqýǵa tústi. T. Júrgenov atyndaǵy Qazaq ulttyq óner akademııasynda bilim alýǵa 5 jas oqý grantyn utyp aldy. Al, 9 túlek «Nur-Múbarak» Egıpet ıslam mádenıeti ýnıversıtetinde, 40 túlek H. Dosmuhamedov atyndaǵy Atyraý ýnıversıtetinde, 1 túlek M. Ótemisov atyndaǵy Batys Qazaqstan memlekettik ýnıversıtetinde, taǵy bireýi Qazaq ulttyq qyzdar pedagogıkalyq ýnıversıtetinde oqıtyn boldy», - deıdi Aınagúl Dúısekenova.
Eske sala ketelik, buǵan deıin UBT-da 132 ball jınaǵan atyraýlyq túlek Ońtústik Koreıa ýnıversıtetine oqýǵa túskenin habarlaǵan edik.
