Atyraý oblysynda 102 jastaǵy eki qarııa saıası tańdaýyn jasady
Qurmanǵazy aýdanyndaǵy Buzaýslan eldi mekeniniń turǵyny Shámil Ómirjanova bıylǵy sáýirde 102 jasqa tolǵan. Búgin ol óz úıinde daýys berdi.
Oǵan №172 ýchaskelik komıssııasynyń músheleri referendým bıýlleteni men jáshigin ákeldi.
Shámil áje ózi turatyn aýdandaǵy Botaqan eldi mekeninde 1920 jyly dúnıege kelgen. Ol 1940 jyly 20 jasynda turmysqa shyqqan. Kúıeýi ekinshi dúnıejúzilik soǵysqa attanǵanda, bir ul, bir qyzymen qalǵan. Al, 1942 jyly «qara qaǵaz» kelip, jesir qalǵan. Taǵdyrdyń qıyndyǵyna moıymaǵan ol temirjol qurylysynda eńbek etken.
Kúıeýi soǵystan oralmaǵan soń anasynyń ruqsatymen ekinshi ret turmysqa shyqqan. Sóıtip, 7 balany ómirge ákelgen.
Kelini Márııa Ómirjanovanyń aıtýynsha, qazir ǵasyrdan da uzaq ǵumyr jasaǵan keıýananyń kózi 20 jyldan beri kórmeıdi. Biraq, qulaǵy estıdi, nemerelerine aqylyn aıtyp otyrady.
«Bizdiń ómirimiz qıyndyqpen ótti ǵoı. Endi sondaı qıyndyqqa jas urpaq urynbasa eken. Kózim kórmese de elimizdiń jaǵdaıy jaqsaryp jatqanyn estip otyramyn. Elimiz tynysh, jurtymyz aman bolsyn, shańyraqtar shaıqalmasyn», -dedi Shámil Ómirjanova.
Al, Abdolla Abdrahmanov Jylyoı aýdanynyń ortalyǵy – Qulsary qalasynda turady. Bıyl jasy 102-ge kelgen.
Munaı uńǵymalaryn burǵylaý operatory bolyp jumys istegen. 1948 jyly jala jabylyp, uzaq jylǵa sottalǵan.
Qýǵyn-súrgin qurbany bolǵan qarııa Qulsary qalasyndaǵy №258 ýchaskede tirkelgen. Ýchaskelik komıssııa músheleri qarııanyń úıine referendým bıýlleteni men jáshigin alyp keldi.
«Elimiz táýelsizdik alǵanda qýanǵan qazaqtyń birimin. Biz kórgen qıyndyqtyń bári artta qaldy. Qazaq eliniń órkendeı bergenin qalaımyn. Konstıtýtsııaǵa engiziletin ózgerister jarqyn kúnderdiń bastaýy bolsyn!», -dedi Abdolla Abdrahmanov.
Eske sala ketelik, buǵan deıin Atyraý oblysynda áskerden búgin oralǵan 4 jigit birden daýys berýge kelgenin, al, Teńiz ken ornynda daýys berýge 10 myńǵa jýyq adamnan ótinish túskenin jazǵan bolatynbyz.
