Atyraý oblysynda 10 myńǵa jýyq gektardan baqsha daqyldary jınaldy
Oblystyq aýyl sharýashylyǵy basqarmasy basshysynyń orynbasary Baǵdat Rústemovtiń aıtýynsha, bıyl egin alqabynyń kólemi ósken.
«Atyraý oblysynda kókónis, baqsha daqyldary egilgen alqaptyń jalpy aýmaǵy 10 myń gektardan astamdy quraıdy. Mahambet aýdany men Atyraý qalasynda egin jınaý jumystary áli de jalǵasyp jatyr. Osy kezge deıin 10 myń gektarǵa jýyq gektardan kókónis jáne baý-baqsha daqyldary, mal azyqtyq ónim jınaldy. Onyń ishinde 92 myń tonnadan astam kókónis, 42 myń tonnadan astam baqsha ónimi, 28 myń tonnaǵa jýyq kartop bar. Al, mal azyǵy daqyldary egilgen alqaptyń 95,5 paıyzynan ónim jınalyp, ekpe shópterden 19 myń tonnaǵa jýyq mal azyǵy daıyndaldy. Sýdy únemdeý tehnologııasy arqyly ósetin egin alqaptarynyń kólemi 4 500 gektarǵa ulǵaıdy», - deıdi Baǵdat Rústemov.
Onyń deregine súıensek, Jylyoı, Isataı, Qyzylqoǵa, Qurmanǵazy, Maqat, Inder aýdandarynda egin jınaý jumysy tolyqtaı aıaqtalǵan. Al, Atyraý qalasy men Mahambet aýdanynda bul jumystyń kórsetkishi 98 paıyzdy quraǵan. Qazan aıynyń sońyna deıin oblys boıynsha egin jınaý naýqany tolyqtaı aıaqtalatyny josparlanyp otyr.
Eske sala ketelik, budan buryn atyraýlyq sharýa júgeriniń «pıoner» sortynan mal azyǵyn daıyndaıtynyn habarlaǵan edik.