Atyraý oblysynda 10 mekteptiń ataýy ózgertildi
ATYRAÝ. QazAqparat - Atyraý oblysynda 10 orta mektepke jańa ataý berildi, dep habarlaıdy «QazAqparat» HAA tilshisi.
«Bıyl jazda Atyraý oblysyndaǵy 10 bilim berý mekemesiniń ataýyn ózgertý týraly QR Úkimetiniń qaýlysy qabyldanǵan bolatyn. Mektepterge tarıhı tulǵalardyń, Ekinshi dúnıejúzilik soǵys batyrlarynyń, «Alash» partııasy qaıratkerleriniń esimderi berildi. Atyraý qalasyndaǵy №2 mektepke Jumeken Nájimedenov; Atyraý qalasyndaǵy №3 mektepke Qasym Qaısenov; Atyraý qalasyndaǵy №23 mektepke Ahmet Baıtursynov; Atyraý qalasyndaǵy №35 mektep-gımnazııaǵa Hamıt Erǵalıev; Atyraý qalasyndaǵy №22 mektepke Álııa Moldaǵulova; Atyraý qalasyndaǵy №6 mektepke Murat Móńkeuly; Qyzylqoǵa aýdanyndaǵy №1 mektep-gımnazııaǵa Yǵylman Shórekovterdiń esimderi berildi», - dep málimdedi Atyraý oblysy tilderdi damytý basqarmasynyń basshysy Ásııa Qystaýbaeva Aımaqtyq kommýnıkatsııa qyzmetinde ótken brıfıngte.
Budan tys, Atyraý qalasyndaǵy Lenın atyndaǵy orta mektep endi Maǵjan Jumabaev esimimen atalatyn boldy. «Balyqshy» shaǵyn aýdanyndaǵy Abaı atyndaǵy mektepke Maqash Bekmuhambetov esimi, al Mahambet aýdanynyń Tańdaı aýylyndaǵy mektepke Qarshyǵa Ahmedıarova esimi berildi.
Sondaı-aq 2017 jyly oblystyq onomastıka komıssııasy 24 kósheniń atyn ózgertý jáne 333 kósheniń attaryn qoldanystaǵy zańdylyqqa sáıkestendirý máselelerin qarap shyǵyp, oń qorytyndylar bergen.
