Atyraý oblysynda 10 medıtsınalyq nysan paıdalanýǵa berildi
ATYRAÝ. QazAqparat – Atyraý oblysynda 10 medıtsınalyq nysan paıdalanýǵa berildi,dep habarlaıdy QazAqparat.
Bul týraly búgin turǵyndar aldynda esep bergen oblys ákimi Mahambet Dosmuhambetov málim etti.
«Máselen, Qurmanǵazy aýdanynda 75 oryndyq ortalyq aýrýhana salyndy. Oblystyq kardıologııalyq ortalyq úshin 50 oryndyq japsarlas ǵımarat turǵyzyldy. Atyraý qalasynda modýldik ınfektsııalyq aýrýhana paıdalanýǵa berildi. Birqatar aýyldyq eldi mekende dárigerlik ambýlatorııalar iske qosyldy. Aýyldyq eldi mekenderdiń turǵyndaryn qamtý úshin 5 jyljymaly medıtsınalyq keshen jumysyn bastady. Byltyr jedel medıtsınalyq járdem qyzmetine 46, osy jyldyń basynda 20 jańa avtokólik berildi. Osylaısha óńirdiń atalǵan qyzmeti qajetti kólikpen 100 paıyz qamtyldy» -dedi Mahambet Dosmuhambetov.
Oblys ákiminiń aıtýynsha, aımaqta 10 densaýlyq saqtaý nysany kúrdeli jóndeýden ótken.
Sondaı-aq, Jylyoı aýdanynyń ortalyǵy – Qulsary qalasynda 75 oryndyq aýrýhananyń qurylysy júrip jatyr.
