Atyraý oblysynda 1 oqýshysy bar bastaýysh mektep jabyldy
Qyzylqoǵa aýdanynda buryn keńshar fermasynyń ortalyǵy bolǵan eldi mekender az emes. Sonyń biri – Kenbaı. Bul aýyl oblys ortalyǵynan 128 shaqyrym qashyqta ornalasqan.
Atyraý oblystyq Bilim basqarmasy baspasóz qyzmetiniń málimetinshe, bul aýylda 37 jyl buryn bastaýysh mektep ashylǵan. Ótken oqý jylynda mektepte 2 oqýshy oqyǵan. Bıyl oqýshynyń biri 5-synypqa, ekinshisi 4-synypqa kóshken. Oqýshylarǵa 6 muǵalim sabaq bergen. Al jaqynda bul bilim ordasy jabyldy. Sebep – oqýshy sany azaıyp, 1 oqýshy qalǵan.
Qyzylqoǵa aýdandyq bilim bóliminiń basshysy Gúlfaırýz Anjanovanyń aıtýynsha, 1 oqýshy Jamansor stansasyndaǵy bastaýysh mektepke aýystyrylǵan. Munda 60 oqýshy bar.
Al muǵalimderge Jamansor jáne Saǵyz stansasyndaǵy mektepterden jumys usynylǵan. Eki ustaz Atyraý qalasynda, biri Maqat aýdanyndaǵy Dossor kentinde jumysqa ornalasqan.
Aýdandaǵy taǵy bir bastaýysh mektep Tasqudyq eldi mekeninde de ashylǵan. Bul mektepte 9 oqýshy oqıdy.
Al Kenbaı aýylyndaǵy turǵyndar bastaýysh mekteptiń túpkilikti jabylmaǵanyn qalaıdy. Óıtkeni, shaǵyn eldi mekende mektepke barýǵa daıyndalyp júrgen balalar bar.
«Bizdiń aýyldyń basty problemasy – bastaýysh mekteptiń jabylýy. Endi balalarymyz alystaǵy aýyldarǵa barýǵa májbúr. Ekinshi másele – aýylymyzǵa áli kúnge tabıǵı gaz jelisiniń tartylmaǵany. Gaz jelisin kútkenimizge 30 jyldan asty» -deıdi Kenbaı aýylynyń turǵyny Edil Temirbolatov.
Eske sala ketelik, budan burynAtyraýda birneshe mekteptiń oqýshylary jóndeý jumysyna baılanysty ózge bilim ordasynda oqıtynyn jazǵan edik.
Keıin Atyraýda 11 mektep úsh aýysymda oqytýdy jalǵastyratynyn habarlaǵan bolatynbyz.
Sondaı-aq Atyraý prokýratýrasy jóndeý júrgizilip jatqan mektepterdi baqylaýǵa alǵan edi.
