Atyraý oblysynda 1 myńnan astam edilbaı tuqymdy qoı tirideı janyp ketti
Órt Qurmanǵazy aýdanynyń Súıindik aýyldyq okrýgine qarasty Jalǵyzapan aýylyna jaqyn mańynda bolǵan.
Jalynnan «Súıindik qoı zaýyty» JShS-niń 1 myńnan astam edilbaı tuqymdy qoıy tirideı janyp ketken.
Aýyl turǵyndarynyń aıtýynsha, órt Reseı Federatsııasyndaǵy Astrahan oblysynyń aýmaǵynda tutanǵan. Keıin Atyraý oblysyna jaıylǵan.
Seriktestiktiń shopany Ýálıhan Qabdrahmanovtyń aıtýyna qaraǵanda, úıine jaqyndaǵan kezde jel kúsheıip, órt órshigen.
«Ózim balalar jatqan úıge áreń júgirip jettim. Úıdiń aınalasyndaǵy shóp janyp ketti. Sonyń saldarynan 1 039 qoıdan aıyryldym. Onyń ishinde óz ıeligimdegi malym da bar», -deıdi Ýálıhan Qabdrahmanov.
Qurmanǵazy aýdanynyń tótenshe jaǵdaılar bóliminiń málimetinshe, qurǵaq shóp órtengen. Reseı Federatsııasynyń aýmaǵynan taraǵan órtti sóndirýge 30 adam men 4 tehnıka tartylǵan.
Jalyndy aýyzdyqtaýǵa Súıindik jáne Jalǵyzapan aýyldarynyń turǵyndary da atsalysqan.
«Qurǵaq shóptiń órtenýinen «Súıindik qoı zaýyty» JShS-niń 1 myńnan astam edilbaı tuqymdy qoıy janyp ketti. Sońǵy aptada aýyl mańynda úsh ret órt tirkeldi. Órtke kúnniń qatty ysýy sebep bolyp otyr», -deıdi Súıindik aýyldyq okrýginiń ákimi Qanat Qulsharov.
Órtengen 1 myńnan astam qoıdyń óleksesi Jalǵyzapan aýyly mańynan qazylǵan shuńqyrǵa kómilgen. Qazir órtten kelgen shyǵyn kólemi eseptelip jatyr.
Edilbaı tuqymdy qoıynyń salmaǵy 145 kelige deıin tartady. Tórt aılyq qozysynyń salmaǵy – 40-45 keli. Bul quıryqty ári etti qoı tuqymyna jatady.
Eske sala ketelik, buǵan deıin Atyraýda eki kúnde «Gaýhartas» turǵyn úı kesheninen úsh ret órt shyqqanyn habarlaǵan bolatynbyz.