Atyraý oblysynda 1 myń adamdy kásipke qaıta daıarlaý bastaldy
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń málimetinshe, jumyssyz júrgen 1 myń adam 11 mamandyq boıynsha qaıta daıarlaý kýrsynan ótedi.
«Qaıta daıarlaý kýrsy eki aıdan tórt aıǵa deıin jalǵasady. Máselen, 4-10 shilde aralyǵynda jumyssyzdardy oqytýǵa irikteý bastalyp, oǵan 680 adam qatysty. Qazir «Teńizshevroıl» JShS-niń korporatıvtik áleýmettik jaýapkershiligi aıasynda «APEC Petro Technic» joǵary kolledjinde, «ILT» oqý orny men «Aqtaý» oqý ortalyǵynda 11 mamandyq boıynsha 350 adam qabyldanyp, qaıta daıarlaý bastaldy. Munda eńbek naryǵyndaǵy qajetti mamandyqtarǵa oqytý júrgizilip jatyr. Jumyssyz adamdar qurylys aǵashtaryn montajdaýshy, jumysshy-betonshy, qalyptaýshy jáne armatýrashy, qubyr montajdaýshy, metall konstrýktsııalaryn montajdaýshy, elektromontajdaýshy, qubyrlardy dánekerleýshi, metall konstrýktsııalaryn dánekerleýshi, boıaýshy, oqshaýlaýshy jáne taǵy basqa mamandyqtar boıynsha oqytylady. Oqytý kýrsy aıaqtalǵan soń, bitirýshilerge kásibı bilimin dáleldeıtin arnaıy sertıfıkat beriledi», -deıdi Azamat Mambetov.
Onyń aıtýynsha, «Teńizshevroıl» JShS-niń qosalqy merdiger mekemelerine, otandyq kompanııalarǵa jumysqa ornalastyrý úshin qaıta daıarlaý kýrsynan ótken mamandar arasynda irikteý júrgiziledi.
«Atyraý oblysynda 2019 jyldan beri 1 139 adam qaıta daıarlaý kýrsynan ótken. Onyń ishinde 692 adam jumyspen qamtylǵan bolatyn. Bıyl jumyssyz júrgen 918 adamdy 11 mamandyq boıynsha qysqa merzimdi kýrsta oqytý josparlanyp, oǵan jergilikti bıýdjet esebinen 158,6 mln teńge qarastyrylyp otyr. Buǵan qosa «Teńizshevroıl» JShS-niń qarajaty esebinen 1 myń adam oqytylady», -dep málim etti Azamat Mámbetov.
Eske sala ketelik, budan buryn Atyraý oblysynda 2 myńǵa jýyq jumyssyz adamdy oqytýǵa 158 mln teńge bólingenin habarlaǵan edik.
