Atyraý oblysynda 1 qańtarda joǵalǵan er adam kórshi aýyldan tabyldy
Atyraý oblystyq polıtsııa departamenti baspasóz qyzmetiniń aqparatyna qaraǵanda, Qurmanǵazy aýdanynyń Reseı Federatsııasymen shekarasyndaǵy Kóptoǵaı selolyq okrýginen joǵalyp ketken er adam kórshiles Shortanbaı aýylynan tabylǵan.
«Shortanbaı aýylyndaǵy dúken satýshysy men ýchaskelik polıtsııa ınspektory joǵalǵan er adamdy tanyp, jedel áreket etken. Sonyń nátıjesinde júıke aýrýlarymen esepte turǵan 51 jastaǵy er adam aǵaıyn-týystaryna jetkizildi. Týysqandarynyń suraýy boıynsha budan ózge aqparatty jarııalaı almaımyz», -dep málim etti polıtsııa departamentiniń baspasóz qyzmeti.
Al, oblystyq tótenshe jaǵdaılar departamentiniń qoǵammen baılanys tobynan málim etkendeı, Qurmanǵazy aýdanyndaǵy Kóptoǵaı selolyq okrýginiń turǵyny 1 qańtarda joǵalyp ketken. Týystary onyń joǵalǵany týraly habardy 2 qańtarda bergen.
«Atalǵan selolyq okrýg Qurmanǵazy aýdandyq tótenshe jaǵdaılar bólimine qarasty №7 órt sóndirý bóliminen 60 shaqyrym qashyqtyqta ornalasqan. Soǵan qaramastan, atalǵan bólimniń qutqarýshylary 2023 jyldyń 1 qańtar kúni úıinen belgisiz baǵytqa shyǵyp, qaıta oralmaǵan 1972 jylǵy er adamdy izdestirýdi toqtatqan joq. Bugin, 4 qańtarda saǵat 17:00 kezinde tabylǵan er adam medıtsınalyq kómekti qajet etpedi», -dep habarlady departamenttiń qoǵammen baılanys tobynan.
Іz-túzsiz joǵalǵan turǵyndy izdestirýge 8 adam men 3 tehnıka tartylǵan. Onyń ishinde tótenshe jaǵdaılar bóliminen 6, aýdandyq polıtsııa bóliminiń 2 qyzmetkeri bar. Sondaı-aq, izdestirý jumystaryna jergilikti atqarýshy organ men aýyl turǵyndary qosylǵan.
Eske sala ketelik, budan buryn Atyraý oblysynda iz-túzsiz joǵalǵan er adam 1 qańtardan beri tabylmaı jatqanyn jazǵan edik.
Foto: Atyraý oblystyq polıtsııa departamenti
