Atyraý oblysynda 1,5 myńǵa jýyq adamdy ıt tistegen
ATYRAÝ. QazAqparat - 2016 jyly Atyraý oblysynda janýarlardyń tistegeninen 1494 adam zardap shekti, dep habarlaıdy «QazAqparat» HAA tilshisi.
Dárigerlerdiń kómegine júgingenderdiń 88,9%-y ıt, 8,1%-y - mysyq, 1,7%-y - iri qara mal, 0,3%-y - jabaıy ań tistegender. 2016 jyly Atyraýda 9 382 qańǵybas ıtter ustalyp, kózi joıyldy.
«Osy maqsatqa qalalyq bıýdjet esebinen 2016 jyly 27,6 mln teńge bólindi. Bıylǵy jyly bul soma 27 mln teńgege deıin qysqardy. Jyldyń basynan beri 154 qańǵybas ıttiń kózi joıyldy. Qańǵybas janýarlar qala turǵyndarynyń ómirine qaýip tóndirýde», - dep aıtty Atyraý ákiminiń orynbasary Amantaı Aıtbaev.
Turǵyndar asyraıtyn árbir ıt ekpe salynyp, veterınarlyq klınıkaǵa tirkelýi qajet. Bul talaptar oryndalmasa, ıt ıesine QR ÁQBK-nyń 408-baby «Itter men mysyqtardy asyraý jáne serýendetý qaǵıdalaryn, qańǵybas ıtter men mysyqtardy aýlaý jáne joıý qaǵıdalaryn buzý» boıynsha 3 AEK kóleminde ákimshilik aıyppul tóleıdi.
