Atyraý oblysyna tapshy dári-dármekter jetkizildi
ATYRAÝ. QazAqparat –Almaty qalasynan Atyraý oblysyna dárihanalarda tapshy bolǵan dári-dármekter jetkizildi, dep habarlaıdy QazAqparat.
Óńirlik kommýnıkatsııalar qyzmetiniń málimetinshe, júk kólikterine tıelgen preparattar qaladaǵy qoımalardyń birine túsirilgen.
«Birneshe kún buryn oblys ákimi Mahambet Dosmuhambetov dári tapshylyǵy máselesin jedel túrde sheshýge qatysty tıisti tapsyrma bergen bolatyn. Soǵan saı, Almatydan qajetti dári-dármekterdiń túrlerin shuǵyl túrde jetkizýdi qamtamasyz ettik. Dáriler dárihanalarǵa burynǵy baǵasymen beriledi. Al, dárihanalardyń baǵany qymbattatpaýy qatań qadaǵalanady», - dedi oblys ákiminiń orynbasary Erjan Ábilhanov.
«INKAR» JShS Atyraý fılıalynyń dırektory Svetlana Lıpatovanyń aıtýynsha, dári-dármektiń 430 túri ákelingen. Onyń 50-ge jýyǵy – antıbıotıkter, azıtromıtsın, tsefazolın, tseftrıakson jáne ınektsııaǵa arnalǵan lıdokaın eritindisi syndy preparattar.
«Asa qajetti dári-dármekterdiń Almaty qalasynan jyldam jetkizilýine qala ákimdigi logıstıka jaǵynan qoldaý kórsetti. Áıtpese, temirjolmen jetkiziler bolsa, jolda kóp ýaqyt joǵaltar edi. Ákelingen dárilik ónimder oblys ortalyǵynan ózge aýdandarǵa da jetkiziledi. Bul partııa oblystyń suranysyn qamtamasyz etedi», - deıdi Svetlana Lıpatova.
Atyraý oblysynyń ákimdigi qajetti dári-dármekterdi barlyq dárihanaǵa jetkizýdi uıymdastyryp, baqylaýynda ustaıdy. Sondaı-aq, aldaǵy ýaqytta preparattardyń baǵasynyń belgilengen mólsherden aspaýyn qadaǵalaýǵa alady. Dári-dármektiń ár adamǵa tıesili mólsherden artyq satylmaýyna qatysty oblys ákimdigi men Atyraý oblysy farmatsevtıka salasynda eńbek etetin jeke kásipkerler men zańdy tulǵalardyń qaýymdastyǵy – «FarmQaýymdastyq» qoǵamdyq birlestigi jáne QR Taýarlar men kórsetiletin qyzmetterdiń sapasy men qaýipsizdigin baqylaý komıtetiniń Atyraý oblysy boıynsha taýarlar men kórsetiletin qyzmetterdiń sapasy men qaýipsizdigin baqylaý departamenti memorandýmǵa qol qoıady dep josparlanyp otyr.
Eske sala ketelik, budan buryn Atyraýǵa demeýshiler qoldaýymen dári-dármekter jetkiziletinin habarlap edik.
