Atyraý oblysyna sáýirden beri 480 tonna qant jetkizildi
Oblystyq kásipkerlik jáne týrızm basqarmasynyń bólim basshysy Nurdáýlet Jumaseıitovtiń málimetinshe, taǵy 768 tonna qantqa tapsyrys berilgen.
«Áleýmettik mańyzy bar azyq-túliktiń qajetti qoryn jasaqtaý úshin óńirge osy jyldyń sáýir aıynan beri 480 tonna qant jetkizildi. Buǵan qosa taǵy 768 tonna qantqa tapsyrys berildi. Qazirdiń ózinde qanttyń 128 tonnasy jetkizilip, saýda núktelerine taratylyp jatyr. Qanttyń bir kelisiniń ortasha baǵasy – 385 teńge», - deıdi Nurdáýlet Jumaseıitov.
Onyń aıtýynsha, azdaǵan ýaqytqa sozylǵan tapshylyq týyndaǵan. Bul tutynýshylar tarapynan qantqa degen suranysty arttyryp jibergen.
«Atyraý oblysyna birinshi surypty un Qostanaı, Aqtóbe, Batys Qazaqstan, Kókshetaý oblystarynan jetkiziledi. Qazir unnyń kóterme baǵasy 162 teńgeni quraıdy. «Aınalma syzbasy» arqyly birinshi surypty un 40 saýda núktesinde 160 teńgeden satylyp jatyr», - deıdi basqarma ókili.
Óńirge unmen birge qosymsha 1000 tonna bıdaı jetkizilgen.
«Birinshi surypty unnyń baǵasy ártúrli, degenmen shekti baǵadan tómen. Shekti baǵa bir keli úshin 191 teńgeni qurap otyr. Bólshek baǵa – bir keli úshin 180 teńge deńgeıinde. Al Atyraý qalasynyń sýpermarketterinde nan baǵasy kóterilgen joq», - dep málim etti Nurdáýlet Jumaseıitov.
Qazir nannyń eń tómengi baǵasy – 110 teńge.
Eske sala ketelik, budan buryn Atyraý oblysynda áleýmettik mańyzy bar azyq-túliktiń qajetti qory baryn jazǵan edik.
