Atyraý oblysyna kóship kelgen 311 etnıkalyq qazaq qandas mártebesin aldy
Oblystyq jumyspen qamtýdy úılestirý jáne áleýmettik baǵdarlamalar basqarmasy sheteldik jumys kúshin tartý jáne kóshi-qon bóliminiń basshysy Meırambek Aldııarovtyń málimetinshe, bıyl shet elderden 311 múshesi bar 252 qazaq otbasy qonys aýdarǵan. Ózge elden atamekenge oralǵan etnıkalyq qazaqtyń barlyǵy qandas mártebesin aldy.
«Qandastarymyz álemniń túkpir-túkpirinen elimizge oralyp jatyr. Jalpy táýelsizdik alǵannan beri Atyraý oblysyna 15 myńnan astam etnıkalyq qazaq kóship keldi. Olardyń basym kópshiligi Qazaqstan Respýblıkasynyń azamattyǵyn aldy. Elge oralǵan etnıkalyq qazaqtardyń elimizdiń aýmaǵynda qalyp, azamattyq alýyna múmkindik berý maqsatynda 1 jylǵa qandas mártebesi beriledi. Osy kezeńde etnıkalyq qazaqtar el azamattyǵyn alyp úlgermese, berilgen qandas mártebesin alty aıǵa tek bir ret uzartý qarastyrylǵan. Qazir Atyraý oblysyna kóship kelgen 43 qandas turǵyn úı kezeginde tur. Al, jumyspen qamtý máselesine qatysty 3 qandas habarlasyp, turaqty jumysqa ornalasty», -deıdi Meırambek Aldııarov.
Onyń aıtýynsha, qandas mártebesin alýǵa úmitker etnıkalyq qazaq jergilikti atqarýshy organǵa nemese memlekettik korporatsııaǵa baryp qyzmet alady. Qujattardy qaraýdyń jáne qandas mártebesin berýdiń jalpy merzimi tórt jumys kúni ishinde júzege asyrylady.
Eske sala ketelik, byltyr Atyraý oblysyǵyna 200-ge jýyq etnıkalyq qazaq kóship kelgen edi.
