Atyraý oblysyna qazaqstandyq zaýyttan 408 tonna qant jetkiziledi
Oblystyq kásipkerlik jáne týrızm basqarmasynyń basshysy Nurbol Jańabekovtiń málimetinshe, Almaty oblysyndaǵy «Kóksý qant» zaýytynyń basshylarymen kelissóz júrgizilip jatyr. Atalǵan zaýyttan óńirge qosymsha 408 tonna qant jetkizý josparlanyp otyr.
«Atyraý oblysyna sáýir aıynan beri 536 tonna qant jetkizildi. «Ideal Market» JShS-niń saýda jelilerine 6 vagonmen 408 tonna, ózge sýpermarket jelilerine 2 vagonmen 128 tonna qant tasymaldandy. Qazir saýda jelileriniń sórelerde qant satylymda tur. Degenmen, qant ár adamǵa 3 keliden satylydy. Sebebi, jeke dúken ıeleri nemese basqa da tutynýshylar qantty bir mezette tómen baǵamen óte kóp mólsherde satyp alýy múmkin. Sóıtip, qant baǵasyna ústeme qosyp, qymbatqa satady. Sondyqtan, sýpermarketterde qant belgili bir merzimde ǵana sórelerge shyǵarylyp turady», -deıdi Nurbol Jańabekov.
Onyń aıtýynsha, azyq-túlik baǵasyn qadaǵalaý maqsatynda saýda oryndaryna reıd júrgizilip jatyr. Mundaı reıdtik is-sharalar aldaǵy ýaqytta aptasyna birneshe ret júrgiziledi.
«Qazir azyq-túlik baǵasynyń turaqtylyǵyna, negizsiz ósýine qadaǵalaý júrgizý úshin monıtorıngtik is-sharalar qolǵa alyndy. Maqsat – turǵyndarǵa azyq-túliktiń qoljetimdi baǵamen usynylýyn qadaǵalaý», -dep málim etti Nurbol Jańabekov.
Eske sala ketelik, buǵan deıin Atyraý oblysyna sáýirden beri 480 tonna qant jetkizilgenin habarlaǵan bolatynbyz.
