Atyraý oblysyna barǵan ftızıator-dárigerler baspanamen qamtylady
ASTANA. QazAqparat - Atyraý oblysynyń ákimi Nurlan Noǵaev óńirde týberkýlezden emdeıtin dárigerlerdiń jetispeıtinin aıtty, dep habarlaıdy QazAqparat tilshisi.
«Týberkýlez boıynsha óńirde em-dom júrgizetin ftızıatorlar jetispeıdi. Ótken aptada respýblıkanyń bas ftızıatorymen, týberkýlez máseleleri jónindegi ınstıtýt jetekshisimen jınalys ótkizdik jáne josparlar jasadyq. Pedagogtar men dárigerlerdiń jetispeýshiligi óte ózekti bolyp otyr»,- dep jaýap berdi Nurlan Noǵaev jýrnalısterdiń suraǵyna.
Onyń aıtýynsha, medıtsınalyq JOO stýdentteri ftızıator mamandyǵyn tańdaýǵa qorqady.
«Jastar bul salany tańdaýǵa qorqady. Dárigerlerdiń ózi qorqady. Ótken jyly 240 dáriger jetispeýshiligi boldy, 126 dárigerdi shaqyra aldyq. Onyń 75-i oqýdy jańa bitirgen jas mamandar. Bıyl júzge jýyq dáriger shaqyrýdy josparlap otyrmyz. Týberkýlezben kúres máselelerimen aınalysatyn mamandardy, ftızıatorlardy baspanamen qamtý boıynsha sharalardy qolǵa alamyz», - dedi Nurlan Noǵaev.
