Atyraý oblysy: Joldyń jolaǵy qısyq syzylǵan

ATYRAÝ. QazAqparat – Atyraý oblysynda joldy jolaqqa bóletin syzyǵy qısyq syzylǵan, dep habarlaıdy QazAqparat.

Bul týraly áleýmettik jelide vıdeo tarap, qoǵamdyq pikir týǵyzdy. Vıdeoda joldy jolaqqa bóletin syzyqtyń qısyq syzylǵany kórsetilgen. Vıdeo avtory «Mynany mas adam syzǵan ba?» dep saýal tastaıdy.

«QazAvtoJol» UK» AQ-nyń baspasóz hatshysy Lázzat Stamǵazıevanyń aıtýynsha, vıdeoda aýdandyq mańyzy bar jol kórsetilgen.

«Bul respýblıkalyq mańyzdaǵy jol emes. «QazAvtoJol» UK» AQ respýblıkalyq joldardy salyp, qaıta jańartyp jatyr», -dedi Lázzat Stamǵazıeva.

Atalǵan vıdeo Atyraý oblysynyń Qurmanǵazy aýdanynda túsirilgeni belgili bolyp otyr. Osyǵan baılanysty Qurmanǵazy aýdanynyń ákimdigi baspasóz qyzmetiniń málimetinshe, aýdan ortalyǵy – Qurmanǵazy aýylyndaǵy «Shıpajaı» shaǵyn aýdanynan turǵyndarǵa jeke turǵyn úı qurylysy úshin jer telimi beriledi. Osyǵan oraı gaz, sý, elektr jelisi, jol sekildi ınjenerlik-kommýnıkatsııalyq ınfraqurylymdar salynyp jatyr.

«Vıdeoǵa qurylys jumystary aıaqtalmaǵan avtomobıl joly túsirilgen. Qurylysty júzege asyratyn merdiger mekeme – «Qaraǵandy joldary» JShS. Atalǵan jumystardy tapsyrys berýshi áli qabyldaǵan joq», -dep habarlady Qurmanǵazy aýdany ákimdiginiń baspasóz qyzmeti.

Aýdandyq ákimdiktiń baspasóz qyzmetiniń málimetinshe, barlyq jumys aıaqtalǵannan keıin jol tańbasyn merdiger esebinen túzetý kózdelip otyr.

Eske sala ketelik, budan buryn Atyraý ákimdigi asfalt topyraq ústine tóselgenine túsinik bergenin jazǵan edik.