Atyraý oblysy: Syrtqa aqqan munaı uńǵymalaryn ákimdik ózi biteýge májbúr
ASTANA. QazAqparat - Atyraý oblysynyń ákimi Nurlan Noǵaev kásipkerlerdi adaldyqqa shaqyrdy.
Bul týraly Atyraý óńiriniń basshysy 20 jeltoqsanda ótken jumys otyrysy barysynda aıtty. Keńeste oblystyń ekologııalyq jaǵdaıy, sonyń ishinde qaraýsyz qalǵan munaı uńǵymalary máselesi sóz boldy, dep habarlaıdy QazAqparat ákimniń baspasóz qyzmetine silteme jasap.
"Aımaqta jer qoınaýyn paıdalanyp otyrǵan kásipker óz isine adal bolýy kerek. Eń bastysy, halyqqa paıdasyn tıgizý baǵytynda jumys isteýi qajet", - dedi aımaq basshysy.
Aıta keteıik, buǵan deıin Atyraý oblysyndaǵy "Kúmisbek" ken ornyndaǵy eki uńǵymadan munaı tógilip, tabıǵatqa zııan kelip jatqany aıtylǵan edi. Ken ornyn qytaılyq úlesi bar "Kóljan oıl" kompanııasy paıdalanyp kelgen. Alaıda jyl basynda fırmamen kelisimshart merzimi aıaqtalyp, kompanııa uńǵymalaryn qaraýsyz tastap ketken.
"Kúmisbektegi" qaraýsyz qalǵan uńǵymalardy óz aqshamyzǵa biteýge májbúr boldyq. Al buǵan jaýapty tulǵalar baılanysqa shyqpaı otyr. Bul, túptep kelgende, olardyń halyq aldyndaǵy jaýapkershiliginiń joqtyǵy. Sebebi, bul - halyqtyń jeri", - dedi Nurlan Noǵaev.
Aımaq basshysy qaramaǵyndaǵylarǵa uńǵyma aınalasyn tazartyp, topyraq qabatyn qalypqa keltirý jumystarymen aınalysýdy tapsyrdy.
Aıta ketelik, 2002-2009 jyldar aralyǵynda Atyraý oblysy ákimdigi óz kúshimen qaraýsyz qalǵan 48 gıdrogeologııalyq uńǵymany bekitken. Qazirgi qaraýsyz qalǵan qaýipti munaı uńǵymalaryn anyqtap, solardy tyǵyndaý baǵytynda jumystar júrip jatyr.
