Atyraý oblysy men Reseı arasyndaǵy saýda aınalymy 30 mln AQSh dollaryna jýyqtady
Atyraý oblysynyń ákimi Serik Shápkenov Reseı Federatsııasyndaǵy Astrahan oblysynyń gýbernatory Igor Babýshkınmen 2023-2026 jyldarǵa saýda-ekonomıkalyq, mádenı-gýmanıtarlyq qatynastardy nyǵaıtý jónindegi qujatqa qol qoıdy.
Ákimniń málimetinshe, 2023 jyldyń qańtar aıynda Atyraý oblysynyń Reseı Federatsııasymen syrtqy saýda aınalymy 29,7 mln AQSh dollaryn quraǵan. Onyń ishinde eksport – 6,2 mln, ımport kólemi 23,5 mln AQSh dollaryna jetken.
«Qazaqstan men Reseı – kópǵasyrlyq tarıhy baılanystyratyn dostyǵy jarasqan elder. Bul baılanystar Eýrazııalyq ekonomıkalyq Odaq, Táýelsiz Memleketter Dostastyǵy jáne basqa da halyqaralyq uıymdar aıasynda jańa mazmunǵa ıe bolyp otyr. Osynyń bárinde de eki el jetekshi ról atqarady. Al Atyraý men Astrahan oblystary arasynda kóp jyldan beri saýda-ekonomıkalyq, ónerkásip, aýyl sharýashylyǵy, balyq sharýashylyǵy, tabıǵatty qorǵaý salalarynda jáne ózge de baǵyttar boıynsha tabysty yntymaqtastyq jolǵa qoıyldy. Eki oblysqa ortaq máselelerdi birlesip sheshý úshin óńiraralyq qatynasty odan ári nyǵaıtý qajet. Sol sebepten, seriktestikti damytý maqsatynda úsh jyldyq is-sharalar josparyna qol qoıdyq», -dedi Serik Shápkenov.
Al, Astrahan oblysynyń gýbernatory Igor Babýshkın óńiraralyq qarym-qatynasty jańa deńgeıge kóterýge múmkindik bar.
«Eki kúnnen beri Astrahan oblysynyń delegatsııasy atyraýlyq áriptesterimen birge aradaǵy yntymaqtastyqty jańa baǵytpen damytý múmkindigin talqylady. Aýyl sharýashylyǵy ónimderimen almasýdy oılastyryp otyrmyz. Biz atyraýlyq aýylsharýashylyǵy ónimderin óndirýshilerdi Astrahan oblysyndaǵy jármeńkege qatysýǵa shaqyramyz. Bizdiń iskerlik-gýmanıtarlyq kelisim-sharttarymyzdy nyǵaıtý maqsatynda Astrahan men Atyraý arasynda tikeleı áýe qatynasy qaıta jandanǵanyn qalaımyz», -dedi Igor Babýshkın.
Eske sala ketelik, buǵan deıinQazaqstan men Reseı órt sóndirýshileri birlesken jattyǵý ótkizip jatqanyn jazǵan edik.
