Atyraý oblysy men Astananyń ákimdikteri yntymaqtastyq týraly kelisim jasady
ATYRAÝ. QazAqparat - Búgin Atyraýda túrli salalardaǵy ózara tıimdi yntymaqtastyq týraly 7 memorandýmǵa Atyraý oblysynyń ákimdigi men Astananyń ákimdigi arasynda qol qoıyldy, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Quramynda Astana qalasy ákimdiginiń túrli basqarmalary men qurylymdyq bólimsheleriniń ókilderi bar úlken delegatsııa jumys saparymen Atyraý oblysynda júr. Elordalyq qonaqtardyń kelýi Astananyń aldaǵy 20 jyldyq mereıtoıyna oraılastyrylǵan.
Sapar aıasynda Atyraý oblysynyń ákimi Nurlan Noǵaevtyń qatysýymen óńiraralyq yntymaqtastyq bıznes kezdesýi ótti.
«Jańa ınnovatsııalyq ıdeıalardy, bıznes jobalardy jáne úlken qalalar men tutas elimizdiń áleýmettik-ekonomıkalyq damýyna yqpal etetin tehnıkalyq jańalyqtardy engizý boıynsha eki qalanyń arasynda tájirıbe almasýdyń mańyzdylyǵyn atap ótti.
«Búgingi kúni Astana Qazaqstannyń barlyq qalalary úshin úlgi bolyp tabylady, bul - otanymyzdyń kelbeti, munda álemdik strategııalyq mindetterdi sheshý úshin kóptegen elderdiń birinshi basshylary keledi, aýqymdy is-sharalar ótkiziledi. Astanada medıtsınanyń, mádenıettiń, bilim men ǵylymnyń barlyq mańyzdy obektileri shoǵyrlanǵan. Sizderdiń oblysymyzǵa saparlaryńyzdyń orny erekshe, biz óńirdi damytý boıynsha elordadan barynsha kóp tájirıbe alýdy nıet etemiz», -dedi Atyraý oblysynyń ákimi qonaqtarǵa arnap sóılegen sózinde.
Astana qalasy ákiminiń orynbasary Ermek Amanshaev basqarǵan delegatsııa ókilderiniń aıtýynsha, Atyraý oblysy qonaqtardyń úlken qyzǵýshylyǵyn týdyrýda, buǵan qosa óńiraralyq yntymaqtastyq birden birneshe baǵyt boıynsha - ónerkásip, aýyl sharýashylyǵy, kásipkerlik, týrızm, tsıfrlandyrý, «Aqyldy qala» tehnologııasyn engizý jáne basqalary boıynsha jasalýy múmkin.
«Astanada 20 jylda iske asyrylǵan tabysty jobalardy Atyraý oblysynda da engizýge bolady. Biz olar týraly aıtqymyz, olardy iske asyrýdaǵy tájirıbemizben bóliskimiz keledi. Eki kúngi saparda Atyraý oblysynyń ákimdigi eki jobaǵa qyzyǵýshylyq tanytty dep aıtýǵa bolady. Bul - ІT-qaýipsizdik salasyndaǵy jobalar, ıaǵnı búkil qala boıynsha kóshe beınebaqylaý kameralaryn engizý, bul qylmysty tómendetýge jáne qylmystardyń ashylýyn arttyrýǵa, sondaı-aq JKO azaıtýǵa múmkindik beredi. Ekinshi joba - biz Astanada oıdaǵydaı engizgen «1000 jańa saýda oryndary» jobasy MJÁ-ke negizdelgen, al jobaǵa memleket bir tıyn da salǵan joq. Saýda alańdaryna arnalǵan jer ýchaskelerin ınvestorlar usyndy, jobany iske asyrý úshin Astanaǵa jańa ınvestıtsııalar tartty jáne jańa jumys oryndaryn qurdy», - dep áńgimeledi Astana qalasy ákimdiginiń ınvestıtsııalar jáne kásipkerlikti damytý basqarmasy basshysynyń mindetin atqarýshy Erlan Bekmurzaev.
Esterińizge sala keteıik, Memleket basshysynyń tapsyrmasy boıynsha elimizdiń barlyq óńirlerinde Astananyń 20 jyldyń mereıtoıyna oraı elordanyń mádenıet kúnderi ótýde. Astanalyq qonaqtardyń sapary eki bólimnen turady - mádenı jáne iskerlik. Astanalyq shyǵarmashylyq ujymdardyń kontsertteri iskerlik toptardyń bıznes kezdesýlerimen, ónerkásiptik jáne óndiristik kásiporyndardy aralaýmen qatar ótýde. Uıymdastyrýshylardyń aıtýynsha, mundaı forýmdar óńiraralyq yntymaqtastyqqa jańa serpin bermek.
