Atyraý oblysy memlekettik bıýdjetke 559 mlrd teńge aýdardy

NUR-SULTAN. QazAqparat – Osy jyldyń 5 aıynda Atyraý oblysy memlekettik bıýdjetke 559 mlrd teńge salyq aýdardy. Bul týraly Ortalyq kommýnıkatsııalar qyzmetindegi brıfıng barysynda Atyraý oblysynyń ákimi Mahambet Dosmuhambetov aıtty, dep habarlaıdy QazAqparat tilshisi.

«2021 jyldyń 5 aıynda memlekettik bıýdjetke 559 mlrd teńge, onyń ishinde, respýblıkalyq bıýdjetke 384 mlrd teńge salyq aýdaryldy. Bunyń syrtynda, Ulttyq qorǵa 357 mlrd teńge tústi. Jyl basynan beri negizgi kapıtalǵa salynǵan ınvestıtsııalar 1 trln 15 mlrd teńgeni qurady. Jalpy 2021 jylǵa boljam - 3,8 trln teńge», - dedi Mahambet Dosmuhambetov.

Onyń dereginshe, 5 aıda ónerkásip óniminiń kólemi 3,2 trln teńgeni qurady. Oblystyń respýblıkanyń ónerkásibindegi úles salmaǵy – 22,7 paıyz.

«19,5 mln tonna munaı jáne 10,2 mlrd tekshe metr ilespe munaı gazy óndirildi. Bıyl Kásipkerlikti qoldaý kartasy aıasynda 837 mlrd teńge bolatyn 5 jobany júzege asyryp, 560 jumys ornyn ashý josparlanýda», - dedi oblys ákimi.