Atyraý oblysy mektepterinde sabaqaralyq úzilis uzaqtyǵy negizsiz qysqarǵan
Atyraý oblysy prokýratýrasynyń baspasóz qyzmetinen málim etkendeı, prokýratýra organdary qadaǵalaýynyń basym baǵyttarynyń biri – kámeletke tolmaǵandardyń quqyqtary men zańdy múddesin qorǵaý.
Osyǵan oraı Jylyoı aýdanynyń prokýratýrasy jalpy bilim berý mekemeleriniń oqýshylary úshin sabaqtar arasyndaǵy úzilisterdiń uzaqtyǵyn retteıtin zańnamanyń saqtalýyna taldaý júrgizgen.
«Aýdan mektepterinde úzilisterdiń uzaqtyǵy negizsiz qysqarǵany anyqtaldy. Bul oqýshylardyń sabaqtar arasynda demalý quqyǵyn shektedi. Prokýrorlyq den qoıý sharalarymen aýdandyq bilim bólimi 863 synyp úshin sabaq kestesin túzetti. Osylaısha, aýdandaǵy jalpy bilim beretin 20 mektepte 18 481 oqýshynyń quqyǵyn qalpyna keltirildi», -dep habarlady prokýratýranyń baspasóz qyzmeti.
Sondaı-aq, oblys prokýratýrada kámeletke tolmaǵandar arasyndaǵy qylmys pen quqyq buzýshylyqtyń aldyn alýǵa baılanysty problemalyq máseleler talqylandy.
«Bizdiń memleketimiz balalardyń qaýipsiz qoǵamda ómir súrýine, sapaly bilim alýyna qolaıly jaǵdaı jasaýdy ustanyp otyr. Demek, kámeletke tolmaǵan jasóspirimder arasynda salaýatty ómir saltyn qalyptastyrýǵa mán bergenimiz jón. Balalardyń quqyqtaryn qorǵaýǵa, olarǵa qatysty zorlyq-zombylyq áreketterin boldyrmaýǵa tıispiz. Osy oraıda ýákiletti organdar qolaısyz otbasylardaǵy balalardyń ómir súrý jaǵdaıyn turaqty negizde tekserip, otbasylyq-turmystyq zorlyq-zombylyqtyń aldyn alýdy júrgizýi, jazǵy kanıkýl kezeńinde oqý oryndarynyń sporttyq qýattaryn tartýy, mektep psıhologtary men áleýmettik pedagogtar úshin trenıngter uıymdastyrýy qajet», -dedi oblys prokýrory Baýyrjan Jumaqanov.
Eske sala ketelik, budan buryn Atyraý oblysynda 15 myńǵa jýyq búldirshin balabaqsha kezeginde turǵanyn jazǵan edik.
