Atyraý oblysy Astananyń týǵan kúnine kópir salyp beredi
ASTANA. QazAqparat - Astananyń 20 jyldyq mereıtoıy qurmetine Atyraý oblysy elordanyń oń jáne sol jaǵalaýlaryn jalǵaıtyn kópir salyp beredi, dep habarlaıdy QazAqparat tilshisi.
Bul týraly oblys ákimi Nurlan Noǵaev Ortalyq kommýnıkatsııalar qyzmetinde ótken brıfıngte málim etti.
"Astananyń 20 jyldyǵy bıylǵy jyldyń eń aıtýly oqıǵasy. Árıne, Atyraý oblysy bul aýqymdy sharaǵa óz úlesin qosady", - dep jaýap berdi Nurlan Noǵaev jýrnalıster suraǵyna.
Ákimniń aıtýynsha, kópir qurylysy 6 mlrd teńgege baǵalandy jáne qurylys jumystary bastalyp ketti.
«Biz Astanadaǵy Mádenıet kópiri mańynda oń jáne sol jaǵalaýdardyń arasyn jalǵaıtyn kópir qurylysyn bastap kettik. Kópirge oblystyq bıýdjetten qarjy jumsaldy, demeýshiler de qol ushyn sozdy. Joba quny shamamen 6 mlrd teńgeni quraıdy", - dedi Nurlan Noǵaev.
Eske sala ketsek, Astana qalasynyń boı kótergenine bıyl 20 jyl tolady. Ataýly dataǵa oraı, elordada túrli mádenı sharalar ótkizý josparlanǵan.
