Atyraý oblysy, Almaty jáne Astana turǵyndary aqshalaı tabysy boıynsha kósh bastap tur
ASTANA. QazAqparat - 2014 jyldyń qazan aıyndaǵy halyqtyń orta eseppen jan basyna shaqqandaǵy ataýly aqshalaı tabystary aldyn ala berilgen derekter boıynsha 61 myń 182 teńgeni qurap, 2013 jylǵy tıisti kezeńmen salystyrǵanda 7,7 paıyzǵa artty. Bul týraly Ulttyq ekonomıka mınıstrligi Statıstıka komıtetiniń baspasóz qyzmetinen habarlandy.
Atap aıtqanda, esepti kezeńde naqty aqshalaı tabystar 0,1 paıyzǵa ósken. 2014 jylǵy qazanda halyqtyń orta eseppen jan basyna shaqqandaǵy ataýly aqshalaı tabystarynyń kólemi boıynsha Atyraý oblysy, Almaty jáne Astana qalalary aldyńǵy qatarda bolyp, munda osy kórsetkish ortasha respýblıkalyq deńgeıden 2,2-1,8 esege artqan.
2014 jylǵy qazanda tabystary eń tómen óńirler qatarynda Ońtústik Qazaqstan, Jambyl jáne Almaty oblystary belgilendi. Osy óńirlerde halyqtyń tabys mólsheri respýblıkalyq deńgeıden 22-38 paıyzǵa tómen. Sonymen birge, halyqtyń naqty aqshalaı tabystarynyń eń kóp ósý qarqyny Mańǵystaý oblysy men Astana qalasynda belgilendi.
2014 jylǵy qazanda óńirler boıynsha ataýly aqshalaı tabystardyń eń joǵary jáne eń tómen mólsherleri arasyndaǵy araqatynas 3,5 eseni quraǵan.
