Atyraý oblysy ákiminiń taǵy bir orynbasary qyzmetinen ketti
Ákimniń orynbasary Qaırat Bekenov jumystan óz erkimen ketý jóninde ótinish bergen.
Ol buǵan deıin qurylys, turǵyn úı-kommýnaldyq sharýashylyǵy, jolaýshylar kóligi jáne avtomobıl joldary salasyna jetekshilik jasady.
Qaırat Bekenov Atyraý oblysy ákiminiń orynbasary bolyp 2020 jylǵy 15 jeltoqsanda taǵaıyndalǵan edi.
Qaırat Asqarbekuly 1978 jyly 31 qazanda dúnıege kelgen.
Qazaq memlekettik basqarý akademııasyn «ekonomıst» mamandyǵy boıynsha, quqyq jáne naryq akademııasyn «Zańger» mamandyǵy boıynsha, Qazaqstan Respýblıkasy Prezıdenti janyndaǵy Memlekettik basqarý akademııasyn «Memlekettik jáne jergilikti basqarý magıstri» mamandyǵy boıynsha bitirgen.
Ár jyldary Almaty qalasynyń salyq ınspektory, QR Qarjy mınıstrliginiń Úkimettik qaryzdardy tartý departamenti basqarmasynyń bastyǵy, QR Prezıdenti Ákimshiliginiń memlekettik baqylaý jáne uıymdastyrý jumysy bóliminiń bas ınspektory bolǵan.
Keıin Astana qalasy Saryarqa aýdany ákiminiń orynbasary, Qyzylorda qalasy ákiminiń orynbasary, Soltústik qazaqstan oblysy ákiminiń orynbasary, «Aqtóbe» áleýmettik kásipkerlik korporatsııasy AQ Basqarma tóraǵasy, Aqtóbe oblysy ákiminiń orynbasary laýazymdaryn atqarǵan.
Buǵan deıin Atyraý oblysy ákiminiń 5 orynbasary bolǵan edi. Qazir eki orynbasar qaldy.
Ákim orynbasarlarynyń biri Baqytgúl Hamenova byltyrǵy jeltoqsannan beri qamaýda otyr. Taǵy ekeýiniń laýazymy qysqartyldy.
