Atyraý oblysy ákiminiń orynbasary Baqytgúl Hamenova revaktsınatsııadan ótti
Oblystyq densaýlyq saqtaý basqarmasy baspasóz qyzmetiniń aqparatyna qaraǵanda, revaktsınalaýdy qatarynda dárigerler men polıtsııa qyzmetkerleri, muǵalimder, quqyq qorǵaý organdary men arnaıy mekemelerdiń qyzmetkerleri, memlekettik qyzmetshiler, sondaı-aq sozylmaly syrqaty bar patsıentter alady.
Búgin, 23 qarashada revaktsınalardy alýǵa alǵashqylardyń qatarynda Atyraý oblysy ákiminiń orynbasary Baqytgúl Hamenova, óńirdiń bas memlekettik sanıtarııalyq dárigeri Mádenıet Tanaýov pen oblystyq densaýlyq saqtaý basqarmasynyń basshysy Ashan Baıdýálıev keldi.
«Men 1 aqpanda Sputnik V vektorly vaktsınanyń І komponentin, al, 21 kúnnen keıin ekinshisin alǵan edim. Búgin QazVac ınaktıvatsııalanǵan otandyq vaktsınany saldyrdym. Qazir ózimdi jaqsy sezinemin» - dedi Baqytgúl Hamenova.
Oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, revaktsına alýshylarǵa vektorly jáne belsendi emes ekpeniń eki túri usynylyp otyr.
«Sputnik V – vektorly, al, ózge vaktsınalar belsendirilmegen. Vektorly vaktsına alǵan adamdarǵa 9 aıdan keıin ınaktıvatsııalanǵan vaktsınany saldyrýǵa bolady. Osy oraıda olarǵa Vero Cell nemese QazVac vaktsınalaryn alý usynylady. Al, kez kelgen ınaktıvatsııalanǵan vaktsına alǵandarǵa Sputnik V vektorlyq vaktsınany 6 aıdan keıin ektiredi» -deıdi Ashan Baıdýálıev.
Eske sala ketelik, budan buryn Atyraý oblysynda balalar men júkti áıelderge Rfizer vaktsınasyn salý bastalǵan edi.
