Atyraý oblysy ákiminiń eki orynbasarynyń laýazymy qysqartyldy
Memleket basshysynyń bıylǵy Joldaýynda aıtylǵan oblystar men respýblıkalyq mańyzy bar qalalar ákimderi apparattarynda memlekettik qyzmetshilerdi ońtaılandyrý týraly tapsyrmany oryndaý maqsatynda Atyraý oblysy ákimi orynbasarlarynyń sany eki adamǵa qysqardy.
«Atyraý oblysy ákimi orynbasary shtattyq birligi qaıta qaraldy. Osyǵan baılanysty ákimniń orynbasarlary Serik Aıdarbekov pen Narıman Taýshovtyń shtattyq laýazymy qysqartyldy», -dep málim etti oblys ákiminiń baspasóz qyzmeti.
Buǵan deıin Atyraý oblysy ákiminiń bes orynbasary boldy. Qazir úsh orynbasar qaldy.
Ákim orynbasarlarynyń biri Baqytgúl Hamenova byltyrǵy jeltoqsannan beri qamaýda otyr. Oǵan qatysty QR Qylmystyq kodeksiniń 366-babynyń 3-bóliginiń 2-tarmaǵymen qylmystyq is tergeldi.
Onymen birge oblystyq mádenıet, arhıvter jáne qujattama basqarmasynyń basshysy Aqylbek Rysqalıev para alý kúdigine ilingen. Kúdiktilerge Abaı eskertkishin jasaý jáne ornatý boıynsha 145 mln teńge somasyna memlekettik satyp alý shartyn jasaǵany úshin bir top adammen aldyn ala sóz baılasý arqyly JShS basshysynan 4,5 mln teńge somasynda para alý kúdigimen qylmystyq is qozǵalǵan.
Eske sala ketelik, budan buryn Atyraý oblysy Jylyoı aýdanyna jańa ákim, Atyraý qalasy ákiminiń jańa orynbasary taǵaıyndalǵanyn habarlaǵan edik.
