Atyraý oblysy ákiminiń burynǵy orynbasary paramen ustaldy
«Sybaılas jemqorlyqqa qarsy is-qımyl ulttyq bıýrosynyń Atyraý oblysy boıynsha departamenti júrgizgen arnaıy jedel-izdestirý sharalary jáne jasyryn tergeý áreketteri aıasynda oblys ákiminiń burynǵy orynbasary jáne ózge de laýazymdy tulǵalarǵa qatysty sotqa deıingi tergeý tirkeldi. Burynǵy ákim orynbasary 5 mektep-ınternattyń ashanasyna jıhaz jetkizýge shart jasasý úshin jaýapkershiligi shekteýli seriktestiktiń ókilinen bilim basqarmasynyń bólim basshysy arqyly 5,1 mln teńge somasynda para aldy dep kúdikke ilindi. Bul soma - sharttyń jalpy somasy 34,1 mln teńgeniń 15 paıyzy», - dedi Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Janna Bastarova agenttikte ótken baspasóz máslıhatynda.
Onyń aıtýynsha, laýazymdy tulǵa Atyraý oblysy bilim basqarmasy, oǵan qarasty ádistemelik ortalyq basshylary jáne basqa da tulǵalarmen birlesip, qylmys jasaǵan. ıAǵnı, úlestes jeke kásipkerler arqyly aqshany qolma-qolǵa aınaldyrý jolymen 2016-2019 jyldarǵa arnalǵan QR bilim jáne ǵylymdy damytýdyń memlekettik baǵdarlamasy aıasynda bir kózden memlekettik satyp alý sharttary boıynsha forýmdardy ótkizý úshin qyzmetter men materıaldardy satyp alýǵa bólingen 10 mln teńge somasyndaǵy iri kólemdegi bıýdjet qarajatyn jymqyrǵan.
«Kúdiktiler ustalyp, Atyraý qalasy polıtsııa basqarmasynyń ýaqytsha ustaý ızolıatoryna qamaýǵa alyndy», - deıdi Janna Bastarova.