Atyraý oblysy ákiminiń burynǵy orynbasary 11 jylyn temir torda ótkizýi múmkin

ATYRAÝ. QazAqparat – Atyraý oblysy ákiminiń burynǵy birinshi orynbasary Nurlan Taýbaev 11 jylǵa, onyń sybaılasy 8 jyl 5 aıǵa túrmege qamalýy múmkin, dep habarlaıdy QazAqparat tilshisi.

Atyraýda oblys ákiminiń burynǵy birinshi orynbasary Nurlan Taýbaev pen qurylys basqarmasynyń burynǵy basshysy Tımýr Basarovqa qatysty sot protsesi jalǵasyp jatyr.

Sot qylmystyq isti qaraýdyń sońǵy satysyna kiristi.

Olarǵa Qulsary qalasyndaǵy aýrýhanany paıdalanýǵa berýge qabyldaý barysyndaǵy qamqorlyǵy úshin 185 mln teńge mólsherinde para alý jáne jemqorlyq aıyby taǵylǵan.

Búgingi sotta eń birinshi bolyp prokýratýra ókili sóz sóıledi.

Ol sottan sottalýshylarǵa qatysty barlyq jeńildetetin jáne aýyrlatatyn mán-jaıdy eskerýdi ótindi.

Prokýror Nurlan Taýbaevty - 11 jylǵa, al jasaǵan qylmysyn jartylaı moıyndaǵan Tımýr Basarovty - 8 jyl 5 aıǵa bas bostandyǵynan aıyrýdy surady.

Zań organy ókiliniń paıymynsha, olardyń ekeýi de qoǵamnan oqshaýlanýy tıis.

Sonymen qatar prokýror sottan ekeýin de ómir boıy memlekettik qyzmette laýazym atqarýdan aıyrýdy surap otyr.

Eske sala keteıik, Nurlan Taýbaev pen Tımýr Basarov 2020 jyldyń qyrkúıeginde qamalǵan bolatyn.