Atyraý oblysy ákiminiń birinshi orynbasaryna qatysty is sotqa berildi

NUR-SULTAN. QazAqparat - QR Sybaılas jemqorlyqqa qarsy is-qımyl agenttigi Atyraý oblysy ákiminiń birinshi orynbasary men Qurylys basqarmasynyń basshysyna qatysty qylmystyq isti sotqa deıingi tergep-tekserýdi aıaqtady, dep habarlaıdy QazAqparat tilshisi.

Atalǵan vedomstvo málimetinshe, olar Atyraý oblysy Jylyoı aýdanynyń Qulsary qalasyndaǵy 200 oryndyq jańa aýrýhana keshenin paıdalanýǵa qabyldaý aktisine qol qoıýǵa járdemdeskeni jáne jalpy qamqorlyǵy úshin bir top adammen aldyn ala sóz baılasý arqyly 185 mln teńge somasynda asa iri kólemde para alýǵa kúdikti boldy.

«Osy jyldyń 3 jeltoqsanynda qylmystyq is Atyraý oblysynyń qylmystyq ister jónindegi mamandandyrylǵan aýdanaralyq sotyna joldandy. Kúdiktiler kinásiniń deńgeıi týraly túpkilikti sheshimdi sot shyǵarady», - dedi agenttikten.

Aıta keteıik, buǵan deıin Atyraý oblystyq sottyń baspasóz hatshysy Boranbaı Galıev olardyń kinási dáleldense 80 eselengen para mólsherinde aıyppul salynatyndyǵyn nemese múlki tárkilenip, 10 jyldan 15 jylǵa deıin bas bostandyǵynan aıyrylatyndyǵyn aıtqan edi.