Atyraý oblysy ákiminiń 50 granty rezıdentýraǵa bólindi
ATYRAÝ. QazAqparat - Atyraý oblysynda 50 talapkerge jergilikti bıýdjetten rezıdentýra granttary bólindi, dep habarlaıdy QazAqparat oblystyq bilim berý basqarmasynyń baspasóz qyzmetine silteme jasap.
Oblys ákimi grantyna ótinish bergen úmitkerler tizimi Atyraý oblysy ákiminiń orynbasary Baqytgúl Hamenovanyń tóraǵalyǵymen ótken otyrysta bekitildi.
Atyraý oblysy ákiminiń orynbasarynyń aıtýynsha, medıtsına qyzmetkerleriniń tapshylyǵy óńirdegi eń kúrdeli máselelerdiń biri. Pandemııa bastalǵan kezde óńirge 300-deı mamannyń jetpeıtindigi salaǵa aýyr tıdi.
Qazir oblys ákimi Mahambet Dosmuhambetovtiń naqty tapsyrmasy boıynsha jergilikti jerde medıtsınalyq mamandar jetispeýshiligin sheshý maqsatynda naqty qadamdar jasalyp jatyr.
Atap aıtqanda, maýsym-shilde aılarynda aımaqqa júzden astam jas maman tartylyp, olardy yntalandyrý, qoldaý tetikteri kúsheıtildi. Sonymen qatar, medıtsına salasyna beriletin granttar sany kóbeıtildi.
Atap aıtqanda, oblys ákiminiń grantyna ıe bolǵandar M.Ospanov atyndaǵy Batys Qazaqstan memlekettik medıtsına ýnıversıtetinde, Qazaq medıtsınalyq úzdiksiz bilim berý ýnıversıtetinde, S.J.Asfendııarov atyndaǵy Qazaq ulttyq medıtsına ýnıversıtetinde, Astana medıtsınalyq ýnıversıteti men Ulttyq ǵylymı kardıohırýrgııa ortalyǵynda bilim alady.
Aıta ketelik, bıyl Atyraý oblysy ákiminiń asa mańyzdy salalar boıynsha bólingen grantyna 139 jas ıe boldy.
