Atyraý oblysy ákimdiginde birneshe basqarmanyń ataýy ózgerip, sany azaıady

ATYRAÝ. QazAqparat – Atyraý oblysy ákimdiginde birneshe basqarmanyń ataýy ózgeredi. Basqarmalar sany 22-den 19-ǵa deıin azaıdy, dep habarlaıdy QazAqparat tilshisi.

Oblys ákimi apaparatynyń basshysy Bolat Isaqovtyń aıtýynsha, jergilikti atqarýshy organdardy memlekettik basqarý júıesin jetildirý jobasy daıyndalǵan. Joba oblystyq máslıhattyń kezekti sessııasynda tanystyryldy.

«Osy kezge deıin 22 basqarma bar edi. Endi 19 basqarma bolady.

Máselen, oblystyq Qurylys basqarmasy men Sáýlet jáne qala qurylysy basqarmasy biriktilip, Atyraý oblysy Qurylys, sáýlet jáne qala qurylysy basqarmasy bolyp qurylady.

Aýyl sharýashylyǵy men Jer qatynastary basqarmalary biriktirilip, Atyraý oblysy Aýyl sharýashylyq jáne jer qatynastary basqarmasy bolyp qaıta atalady.

Balyq sharýashylyǵy basqarmasy Tabıǵı resýrstar jáne tabıǵat paıdalanýdy retteý basqarmasyna qosylady.

Al Kásipkerlik jáne Týrızm, Indýstrııalyq-ınnovatsııalyq damý, Dene shynyqtyrý jáne sport, Mádenıet jáne tilderdi damytý, Arhıv isi basqarmalary biriktiriledi. Osyǵan baılanysty Atyraý oblysy Kásipkerlik jáne ónerkásip basqarmasy, Atyraý oblysy Sport jáne týrızm basqarmasy, Atyraý oblysy Tsıfrlandyrý jáne arhıvter basqarmasy, Atyraý oblysy Mádenıet jáne tilderdi damytý basqarmasy qurylady.

Oblystyq Ekonomıka jáne bıýdjettik josparlaý basqarmasy men Qarjy basqarmasy Atyraý oblysy Ekonomıka jáne qarjy basqarmasy, oblystyq Memlekettik satyp alý jáne kommýnaldyq menshik basqarmasy bolyp ózgeredi», - dep habarlady Bolat Isaqov.

Eske sala ketelik, budan buryn Qaısar Abdalıev Atyraý oblystyq Densaýlyq saqtaý basqarmasyna basshy bolyp taǵaıyndalǵanyn habarlaǵan bolatynbyz.