Atyraý oblysy ákimdigi shyndyqty aıtqan aýyl qarııasynyń sózine qatysty málimdeme jasady
ASTANA. QazAqparat - Atyraý oblysy ákiminiń baspasóz qyzmeti aýyl qarııasynyń «kryshasy» bar brakonerler týraly aıtqan sózine qatysty málimdeme jasady.
Esterińizge salaıyq, buǵan deıin Aqqystaý aýlynyń turǵyny Saǵynǵalı qarııa oblys ákimi Nurlan Noǵaevqa «kryshasy» bar brakonerlerdiń kóp ekenin aıtyp, zańsyzdyqtan arasha suraǵan edi.
Baspasóz qyzmetiniń habarlaýynsha, zańsyz balyq aýlaý men sý marjanyn kóbeıtý jolyndaǵy kúres báseńsimeıdi.
«2 aı ishinde eldiń batysyndaǵy úsh oblysta zańsyz aýlanǵan 60 tonnadan astam balyq pen 3 myńǵa jýyq balyq aýlaý quraldary tárkilendi», - delingen habarlamada.
Aıtýlarynsha, "Bekire-2017" aktsııasynyń aıasynda barlyǵy 711 zańsyzdyq tirkelip, onyń 100-ge jýyǵyna qatysty qylmystyq is qozǵalǵan.
Balyq sanyn kóbeıtý úshin jasalatyn Jaıyq ózenindegi "ıAıtskıı" jáne Qıǵash ózenindegi "Ganıýshkıno" kanaldaryn tereńdetý jumysynyń sheshimi bıyl tabylǵany da belgili boldy.
Bul jumys balyqtardyń ýyldyryq shashýyna qolaıly jaǵdaı týǵyzyp, sý marjanynyń qystaıtyn shuńqyrlaryna jetýin ońaılata túspek.
Jumys bıyl úshinshi toqsanda bastalady dep josparlanǵan.
Aıta ketelik, bıylǵa deıin Jaıyq ózeniniń 16 shaqyrymyn tereńdetý jobasy júzege asqan edi.
Esterińizge salaıyq, balyq ýyldyryq shashatyn mezgilde sý kóligin júrgizý erejesine narazy bolǵan bir top atyraýlyq azamat sáýirde bılik ókilderimen qaqtyǵysty. Sebebi, balyq qorǵaýmen aınalysatyn ınspektsııa sý jándiginiń kóbeıýine kedergi bolmaý úshin motorynyń qýaty 20 attyń kúshinen asatyn qaıyqtardy teńizge shyǵarmaı qoıǵan. Keıin narazylyq tanytqan 37 adamnyń turaqty jumysqa ornalasýǵa keliskeni belgili boldy.
Birneshe kún ótken soń zańsyz aýlanǵan 4 tonna balyqtyń Reseıge ótip ketkeni anyqtalyp, kóp uzamaı jergilikti Orman sharýashylyǵy jáne janýarlar dúnıesi aýmaqtaq ınspektsııasynyń basshysy Murat Ermekqalı óz erkimen jumysynan ketý týraly aryz jazdy.
Baspasóz qyzmetiniń habarlaýynsha, Isataı aýdany turǵyndaryn jumyspen qamtý baǵytyndaǵy sharalar kúsheıgen. Máselen qazir aýdanda 2 mamandyq boıynsha kásiptik bilim berýdi uıymdastyrý júzege asyrylyp jatyr, jaqyn mezgilde kolledj ashý máselesi de kóterilgen.
