Atyraý oblys ákiminiń orynbasary mektep-ınternattaǵy balalardyń jaǵdaıyn tekserdi
ATYRAÝ. QazAqparat - Atyraý oblysy ákiminiń birinshi orynbasary Serik Shapkenov tárbıeshiler tarapynan kúsh kórsetý derekteri anyqtalǵan tilinde aqaýy bar balalarǵa arnalǵan mektep-ınternatqa bardy, dep habarlaıdy QazAqparat.
Serik Shapkenov qoǵam ókilderimen birge mektep-ınternattaǵy balalardyń jaǵdaıyn tekserdi. Komıssııa músheleri balalardyń palatalaryn qarap, oqý-ádistemelik bazamen, ashana men medbólimsheniń jaǵdaıymen tanysty.
Komıssııa múshelerin tárbıeshiler tarapynan durys baqylaýdyń joqtyǵy, balalar jatqan palatalardyń sanıtarlyq normalarǵa saı emestigi alańdatty.
Mekeme dırektory Rymbek Turdaǵalıdyń aıtýynsha, ol bul laýazymǵa ótken jyly kelgen.
«Jaýapkershilikten jaltarýǵa bul sebep emes. Jumyspen qamtýdy úılestirý jáne áleýmettik baǵdarlamalar basqarmasynyń basshysy eki aı buryn taǵaıyndaldy, men de osy salaǵa jaqynnan beri jetekshilik etemin. Biraq bul bizden de, osy salaǵa birneshe jyldan beri jetekshilik jasap otyrǵan adamdardan da jaýapkershilikti alyp tastamaıdy. Barlyǵyna shara qoldanylady, erekshe balalarǵa tikeleı jaýapty basqarma basshysynyń orynbasaryna sógis jarııalandy. Іs munymen bitpeıdi, qyzmettik tekserý qortyndysyna sáıkes, barlyq jaýapty tulǵalarǵa qatysty sheshim qabyldanady. Biz jaǵdaıdy jurtshylyqtyń ashyq baqylaýyna shyǵaramyz - ÚEU ókilderi ár ınternatty qarap, bizdiń jumysymyzǵa baqylaý jasaıdy. Sizderdiń ótken jyly laýazymǵa taǵaıyndalyp, biraq eshqandaı shara qoldanbaǵandaryńyz bárin óz betimen jibergenderińizdi kórsetedi. Áreketterińizge baǵa beriledi», - dedi Shapkenov.
Dırektordyń kabınetinde beıne baqylaý kamerasy bar, sol arqyly balalarǵa qol kóterý derekteri anyqtalǵan. Jaǵdaıdy mekeme qyzmetkerleri emes, prokýratýra anyqtady.
«Sizdiń kabınette otyryp, qyzmetkerlerińizdiń balalarmen qandaı qarym-qatynasta ekenin qaraýǵa murshańyz bolmady. Tipti Sizdiń ózińizge jasap otyrǵan jaǵdaıyńyz ben balalardyń halin salystyrý arqyly kóp nársege kóz jetkizýge bolady. Eger balalar Sizdiń jumys ornyńyzdyń jaǵdaıyndaı jerde ómir súrse, bári basqasha bolar edi. Bul-jaýapsyzdyq.
Oblysta komıssııa quryldy, quramynda bilim berý, halyqty áleýmettik qoldaý, qoǵamdyq densaýlyq saqtaý, densaýlyq saqtaý salalarynyń ókilderi, qarjy aýdıtorlary men qoǵam ókilderi bar. Komıssııaǵa múmkindigi shekteýli adamdar turatyn mekemelerdi kez kelgen ýaqytta tekserýge quqyq berilgen. Komıssııa jumysynyń qorytyndysy boıynsha jaǵdaıdy jaqsartýǵa usynystar beriledi»,-dedi Serik Shapkenov.
Atyraý oblysy ákiminiń birinshi orynbasary barlyq kabınetterge ınternetke qosylǵan veb-kamera ornatýǵa tapsyrma berdi, sol arqyly ata-analar, komıssııa músheleri men tekserýshi organdar balalardyń jaǵdaıyn táýlik boıy baqylaı alady.
Buǵan deıin habarlaǵandaı, ınternatta ata-ana qamqorlyǵynsyz qalǵan 98 bala tárbıelenedi. Prokýratýra tekserýinen keıin tárbıeshilerdiń múmkindikteri shekteýli balalarǵa zábir kórsetip, qol jumsaý derekteri anyqtalǵan bolatyn.
Osydan keıin mektep-ınternat basshylyǵyna qatysty qyzmettik tergeý bastaldy.
