Atyraý mýzeıindegi qundy jádigerler ınteraktıv keshen arqyly kórsetiledi

ATYRAÝ. QazAqparat – Atyraý oblystyq tarıhı-ólketaný mýzeıindegi qundy jádigerler ınteraktıvti keshen arqyly kórsetiledi. Munda ınteraktıvti ekspozıtsııalyq-golografııalyq jáne «Mýzeıtaný» baǵdarlamalyq-ınteraktıvti kesheniniń qurylǵylary iske qosyldy, dep habarlaıdy QazAqparat.

Torus.kz kompanııasynyń basshysy Dáýren Ǵabdýllaevtyń aıtýynsha, jańa qurylǵylar mýzeıdiń kireberis foıesine, etnografııa jáne arheologııa ekspozıtsııalyq zaldaryna ornatylǵan.

«Mýzeıdegi ınteraktıvti ekspozıtsııalyq-golografııalyq kesheninde mýzeı qoryndaǵy jádigerlerdiń ár tustan túsirilgen 3D sýretteri kórinis beredi. Oǵan mýzeı qoryndaǵy 100 jádiger engizildi. Bul zamanaýı qurylǵylardyń árqaısysy úsh bólikten turady. Onyń joǵarǵy bóliginde jádigerler vırtýaldy túrde 23 dıýımdyq keń formatty dıspleı arqyly usynylady. Ortańǵy bóligi golografııalyq element eksponattary anımatsııalyq 3D effektimen kórsetýge arnalǵan. Al, tómengi bóliginde naqty eksponatty ár qyrynan burý elementteri arqyly kórsetiledi», -deıdi Dáýren Ǵabdýllaev.

Ekinshi jańa qurylǵy – «Mýzeıtaný» baǵdarlamalyq-ınteraktıvti kesheni.

Bul qurylǵyda mýzeıdiń tarıhy men jádigerlik qory, bólimsheleri men bólimderi týraly derekter, zaldar boıynsha vırtýaldy týrlar, mýzeıdi basqarǵan basshylardyń ómirbaıandary, mýzeıdiń tarıhı oqıǵalarynyń mýltımedıa materıaldary, fotogalereıa, 3D jádigerler bar.

«Jańa qurylǵylar arqyly mýzeıge kelýshiler ólke tarıhy men saqtalyp turǵan qundy jádigerler týraly maǵlumatpen az ýaqyttyń ishinde tanysýǵa múmkindik alady. Bul mýzeıdegi qundy jádigerlerdi tsıfrlandyrýǵa alǵashqy qadam deýge bolady», -deıdi mýzeı dırektorynyń mindetin atqarýshy Dınara Bısembaeva.

Eske sala ketelik, budan buryn Atyraý oblysynda kóne qorǵannan sarmat dáýirindegi jádigerler tabylǵanyn jazǵan bolatynbyz.

Atyraý oblystyq tarıhı-ólketaný mýzeıi arheologııa ǵylymı-zertteý bóliminiń meńgerýshisi Aıdos Qalshabaevtyń deregine súıensek, qazba júrgizilgen qorǵandar bizdiń zamanymyzǵa deıingi VI-IV ǵasyrlardaǵy savromat-sarmat dáýirine jatady.

«Qazba kezinde №3 qorǵannyń ortalyq jerleý orny tonalǵany anyqtaldy. Odan ártúrli tústegi monshaqtar tizbesi, qaıraq tas, al adam jerlenbegen bos qabirden (kenotaf) temir qanjar (aqınaq) tabyldy. Jasóspirim jerlengen qabirge 2 qysh ydys qoıylǵan. Al, №4 qorǵandy zertteý kezinde eki adamnyń shashylǵan súıegi men birqatar qola jebelerdi taptyq», - deıdi Aıdos Qalshabaev.